DILI, 04 novembru 2021 (TATOLI)–Ministériu Finansa (MF) liuhosi Sekretariadu Tékniku Fundu COVID-19, iha semana kotuk halo ona pagamentu suplementu remuneratóriu ba liña frente hosi membru Polísia Nasionál Timor-Leste (PNTL) hamutuk 3.821 ba períodu fulan-marsu to’o maiu 2021 ho montante millaun $3,1.
Nune’e mós, iha loron 18 outubru 2021, MF realiza pagamentu suplementu remuneratóriu ba liña frente hosi Sentru Integradu Jestaun Krize (CIGC, sigla portugés) hamutuk na’in-449 ba períodu fulan-fevereiru to’o maiu 2021 ho montante $322.925.
Notísia relevante: MF halo pagamentu suplementu remuneratóriu pesoál liña frente CIGC
Aleinde ne’e, iha loron 12 outubru 2021, MF realiza pagamentu suplementu remuneratóriu liña frente hosi Polísia Migrasaun hamutuk na’in-143 ba períodu fulan-marsu to’o juñu 2021 ho montante $158.790.
Iha loron 31 outubru 2021, MF ezekuta ona pagamentu suplementu remuneratóriu liña frente ho valór millaun $3,5 hosi totál orsamentu retifikativu alokadu ba liña frente hamutuk millaun $51.
Jornalista : Arminda Fonseca
Editora : Julia Chatarina
