iklan

BAUCAU, HEADLINE, MUNISÍPIU, SOSIEDADE SIVĺL

Dom Basílio haloot ona iha fatin ikusliu

Dom Basílio haloot ona iha fatin ikusliu

Prosesu fúnebre ba Dom Basílio do Nascimento iha Igreja Katedrál Baucau, kuarta (04/11). Imajen TATOLI/Natalino Belo.

BAUCAU, 04 novembru 2021 (TATOLI) –  Bispu Dioseze Baucau, Dom Basílio do Nascimento, kuarta ne’e haloot ona fatin ikusliu iha Igreza Katedrál Baucau.

Hosi observasaun Agénsia TATOLI nota, bainhira kaisaun lori sai hosi Igreja Katedrál ba aredór Igreja, sarani sira lori hena, imajen hakne’ak hodi husu perdaun no omenajen ikus ba Dom Basílio do Nascimento nia isin-mate antes haloot iha fatin ikus iha Igreja Katedrál laran.

Bainhira Isin-mate Dom Basílio iha portaun entrada igreja oin, sarani sira simu ho lian agradesimentu inklui hato’o deskulpa ba Dom Basílio liuhosi lia dadolin, tiru dala-tolu hosi F-FDTL.

Molok hatún ba rai-kuak, lia-na’in hosi Munisípiu Aileu hamulak hanesan parte lisan hosi Dom Basílio do Nascimento nia orijinalidade.

Bispu Dioceze Dili, Dom Virgílio  do Carmo da Silva, hateten serimónia ne’e ikus ona, ne’ebé fó kmaan ba ema hotu no fiar katak loron ida ita sei hetan fali no hamutuk ho nia iha Maromak nia uma.

“Iha-ne’ebá Kristu nia Domin ne’ebé manán ona buat hotu, rohan laek,” Dom Virgílio hateten bainhira fó bensaun ikus ba Dom Basílio iha Igreja Katedrál Baucau, kuarta ne’e.

Entretantu, Prezidente Konferénsia Episkopál Timorense (CET, Sigla Portugés) no Bispu Dioseze Maliana, Dom Noberto Amaral, husu atu sarani Katólika Timor-Leste atu halo refresaun ho Dom Basílio nia mate.

“Ita hotu-hotu hatene nu’udar ema fiar-na’in katak ida-ne’ebé haruka ita mai no fila ba Maromak de’it. Nia mak hún no rohan ne’ebé iha ita idak-idak nia laran, se ita rekoñese hún no rohan ida-ne’e, ita soi atu hahí,” Dom Norberto hateten.

Bispu Dioseze Maliana ne’e dehan, ho Dom Basílio nia mate iha momentu ida-ne’e ne’ebé halibur sarani hotu hamutuk iha igreja Katedrál halo halo ema hanoin pontu importante tolu.

Dahuluk, fo hanoin katak bainhira kolega, belun, aman-inam, kaben, fén mate, ne’e iha situasaun tristeza boot laran susar maibé labele hela de’it iha mundu tenke foti aan ba Jesús katak maske mate, ema sei moris fali rohan laek.

Daruak, fó hanoin ba sarani katak ema iha hún no rohan mak Maromak de’it tanba ne’e nu’udar sarani tenki fiar ba Nia.

Datoluk, ho eventuál ida-ne’e ne’ebé Dom Basílio husik, atu sarani sira halo revogasaun ba moris tanba ho fiar tomak bele hafoun moris hodi lori ba dalan loloos to’o ikus mai bele hakat hosi mundu ida-ne’e ba mundu rohan laek.

“Dom Basílio ita hotu hatene nu’udar ema ida iha ema hotu nia lee , Maromak hili hodi sai saseluk ida kmanek tebes iha kreda Katólika Timor-Leste nian,” Dom Noberto hateten.

Iha serimónia fúnebre ne’e partisipa hosi Primeiru Ministru, Taur Matan Ruak, Prezidente Parlamentu Nasionál, Xefe Estadu Maiór Jenerál F-FDTL, Tenente Jenerál Lere Anan Timur, Xefe Casa no Militár Prezidente Repúblika, Prokuradór Jerál Repúblika, Komisariu Komisaun Anti Korrupsaun (CAC, sigla Portugés), lideranasa lokál, Reprezentante Komunidade Musulmanu no sarani sira.

Notísia relevante: Biografia Bispu Basílio no bele ko’alia lian estranjeira neen

Jornalista         : Natalino Belo

Editór               : Evaristo Soares Martins

iklan
iklan

One Comment

  1. Deskansa Em Paz Amo Bispo Dom Basilio do Nascimento, ami fiar katak ita boot hamutuk ona ho Anjo sira iha renho Lalehan, sai Guarda no reza nafatin mai ami Povu Timor-Leste. ami hotu hadomi ita boot maibe NAIN ne’ebe haruka ita boot mai mundo HADOMI liu ita boot no lori fila fali ba NAIN NIA KADUNAN SANTO, AMIN.

Leave a Reply

iklan
error: Content is protected !!