DILI, 04 novembru 2021 (TATOLI)—Komisaun G ne’ebé trata asuntu Edukasaun, Juventude, Kultura halo audiénsia públika ho Ministériu Edukasaun Juventude no Desportu (MEJD) kona-ba Orsamentu Jerál Estadu (OJE) 2022, ne’ebé prevee $81.708.623.
Orsamentu ne’e aloka ba saláriu no vensimentu $64.929.539, bens no serbisu $12.103.627, transferénsia públika $2.219.798, kapitál menór $124.200, no kapitál dezenvolvimentu $2.331.469.
Ministru Edukasaun Juventude no Desportu, Armindo Maia, hateten, durante audiénsia, membru sira husu MEJD nia esplikasaun kona-ba alokasaun, nune’e bele konvense hodi defende iha plenária.
“Ita-nia orsamentu ba tinan 2022 ne’e iha redusaun, ne’ebé prevee de’it millaun $81-resin atu responde ba programa tolu,” Ministru Armindo hateten iha resintu Parlamentu Nasionál, kinta ne’e.
Notísia relevante: 2022, MEJD-INCT propoin adisionál milaun $13
Iha tinan 2022, MEJD aloka osan ba programa tolu hanesan boa governasaun no jestaun institusionál ho orsamentu $7.220.129 edukasaun no formasaun ho orsamentu $74.443.494 inklui igualidadi jéneru inkluzaun sosiál ho orsamentu $45.000.
“Redusaun orsamentu akontese ba ministériu hotu, la’ós ba de’it Ministériu Edukasaun, Juventude no Desportu. Nune’e orsamentu ne’ebé iha, sei kontinua apoiu nesesidade eskola sira, maski orsamentu hetan korta maka’as liu maka iha transferénsia públika ba infraestrutura edukativa nian,” nia akresenta.
Maibé, MEJD sei iha apoiu millaun $15 hosi banku mundiál liuhosi projetu Basic Education Strengthening and Transformation (BEST), ne’ebé verba ne’e sei uza hodi apoiu dezenvolvimentu edukativa iha eskola sira, hahú hosi tinan ne’e to’o tinan oin.
“Karik labele responde hotu, naran katak bele halo netik buat ruma,” nia tenik.
Jornalista : Tomé Amado
Editora : Julia Chatarina
