OÉ-CUSSE, 04 novembru 2021 (TATOLI) — Ministériu Interiór (MI) liuhosi Sekretaria Estadu Potesaun Sivíl (SEPS), kinta ne’e hala’o sensibilizasaun Lei bázika Protesaun Sivíl hamutuk artigu-59 ba entidade sira iha Rejiaun Administrativa Espesiál Oé-Cusse Ambeno (RAEOA).
“Ohin, halo sensibilizasaun lei bázika Protesaun Sivíl númeru 12/2020, 02 dezembru, tanba hetan ona promulgasaub hosi Prezidente Repúblika hamutuk artigu-59. Atividade sensibilizasaun ne’e realiza ona iha munisípiu-12, ohin ensera iha Oé-Cusse, no semana oin hala’o dala ida-tán iha Díli hanesan ikusliu ona,” Diretór Nasionál Prevensaun Konflitu Komunitária, António Viegas, informa ba Agência Tatoli iha salaun edukasaun Oé-Cusse.
Lei bázika Protesaun Sivíl foin mak hahú, tanba iha Timor-Leste iha lei tolu importante hanesan, lei ba seguransa no defeza, lei ba seguransa interna hanesan PNTL no lei ba protesaun sivíl, maibé ba lei protesaun sivíl foin mak hahú iha VIII Governu, tan ne’e maka komesa hala’o sensibilizasaun ba entidade sira tomak iha munisípiu hotu-hotu.
Objetivu hosi sensibilizasaun ne’e hanesan preparasaun atu realiza lei Protesaun Sivíl nian hahú iha tinan 2022.
Reprezentante Prezidente Autoridade RAEOA atuál Adjuntu Prezidente Autoridade ba Asuntu Sosiál, Maximiano Neno, agradese ba Governu sentrál tanba lei bázika Protesaun Sivíl importante nune’e bele regula komponente protesaun sivíl sira, hanesan área dezastre naturál, Bombeiru, PNTL, F-FDTL no setór sira seluk.
“Serbisu ba protesaun sivíl ne’e ekipa atu responde ba situasaun ruma, atu harii ekipa ne’e bazea orientasaun legál tanba lei ne’e hanesan instrumentu legál mak orienta ita hala’o servisu,” nia katak.
Entretantu, partisipa iha sensibilizasaun ne’e mai hosi Departementu Sosiál no Inkluzaun, Protesaun Sivíl RAEOA, BOMBEIROS, CVTL, PNTL ho FDTL, ONG lokál, lidér komunitáriu no jestór sub-rejionál.
Notísia relevante: http://www.tatoli.tl/2020/07/21/pn-aprova-ona-proposta-lei-protesaun-sivil/
Jornalista: Abílio Elo Nini
Editór: Evaristo Soares Martins
