OÉ-CUSSE, 05 novembru 2021 (TATOLI) — Autoridade Rejiaun Administrativa Espesiál Oé-Cusse Ambeno (RAEOA) ezekuta ona fundu COVID-19 46.34% hosi montante orsamentu millaun $2,414,371.75 iha orsamentu 2020 no 2021.
“Orsamentu aloka mai hosi fundu COVID-19 iha RAEOA hosi Governu Sentrál liuhosi Ministériu Saúde ba prevensaun no mitigasaun COVID-19, hamutuk millaun $2,414,371.75, agora progresu ezekusaun iha RAEOA atinje ona 46,34%,” Sekretáriu Rejionál ba Asuntu Saúde, Manuel da Costa, informa ba Agência Tatoli iha Santa Rosa, Oé-Cusse, sesta ne’e.
Progresu ezekusaun hosi fundu COVID-19 ne’e, iha nia despeza ba iha kategória tolu komposta hosi bens (sasán) no servisu, kapitál minór no kapitál dezenvolvimentu.
Bens servisu
Hosi kategoria ida-ne’e ezekuta $661,328.97 ne’ebé aloka ba iha formasaun profisionál ba funsionáriu saúde, viajen lokál, manutensaun veíkulu karreta sira, fornesimentu materiál operasionál, kombustivél ba transporte sira, manutensaun ba ekipamentu no edifísiu, fornesimentu alimentár ba pasiente sira iha kuarentena obrigatóriu.
Nune’e mós prevee orsamentu ba asistensia téknika ba vijilánsia sira atu halo kontrolu apoiu serbisu iha liña fronteira sira hanesan iha sub-rejiaun Oésilo, fronteira Wini Sakato, fronteira Pássabe no Citrana nomoos portu, aeroportu inklui servisu traijen ba postu saúde no sentru saúde inklui Hospitál Referál Oé-Cusse, aloka mós ba servisu sanitária limpeza ka dezinfeta ba iha fatin kuarentena no izolamentu.
Kapitál minór
Hosi kategoria kapitál minór ezekuta $48,340 ne’ebé aloka hodi sosa mobiliáriu ekipamentu ba iha kuarentena sira.
Kapitál dezenvolvimentu
Kategoria kapitál dezenvolvimentu ne’e ezekuta $938,223,33, hodi konstrui infraestrutura kuarentena iha zona Pante Makassar hanesan kuarentena Kuimaonteko, kuarentena Sakato, kuarentena portu Mahata, kuarentena iha sub-rejiaun Oésilo, kuarentena iha sub-rejiaun Pássabe no kuarentena iha sub-rejiaun Nítibe.
Nune’e mós halo konstrusaun ba iha sala izolamentu COVID-19, kontrusaun laboratóriu rejionál ba COID-19 no konstrusaun sala Unidade Kuidadu Intensivu (ICU) inklui banku de sangue, lavandária, armazein iha Hospitál Referál Oé-Cusse, instalasaun bee-moos ba kuarentena, adisionál ba izolamentu sira, adisionál ba sala ICU no adisionál ba laboratóriu.
Jornalista : Abílio Elo Nini
Editór : Evaristo Soares Martins
