OÉ-CUSSE, 05 novembru 2021 (TATOLI) — Hahú hosi fulan-jullu to’o outubru 2021, Servisu Rejistrasaun no Verifikasaun Emprezariál Institutu Públiku (SERVE, I.P) sukursál Rejiaun Administrativa Espesiál Oé-Cusse Ambeno (RAEOA) kontribui reseita $2,464.15 ba kofre Estadu liuhosi fonte atividade rejistu komersiál.
“Iha fulan jullu SERVE,IP rekolla $503,15, agostu rekolla $387,00, iha setembru rekolla $775,00 no iha outubru rekolla $799,00, ne’ebé reseita hatama ba kofre Estadu ba fulan haat ne’e hamutuk $2,464.15,” Koordenadór SERVE,I.P-RAEOA, Reinaldo António Mendonça, informa ba Agência Tatoli iha Santa Rosa, Oé-Cusse, sesta ne’e.
Reseita hirak-ne’e mai hosi trata dokumentu empreza nian, loke lisensa atividade negósiu ho kategória la hanesan, balu loke empreza ho Enin, balu Unipesoal Lda no balu SA.
Dezde Governu instala SERVE, I.P iha RAEOA iha 2018, komunidade barak iha inisiativa halo rejistu foun no loke lisensa ba atividade negósiu no empreza hanesan Enin, Unipesoál Lda, no SA hamutuk 219, nune’e iha 2019 rejistu foun 119 no iha 2020 rejistu foun hamutuk 99.
Nune’e hahú hosi janeiru to’o outubru rejistu foun hamutuk 101, totál hosi 2018 to’o agostu 2021 ne’e SERVE,I.P sukursál Oé-Cusse simu rejistu foun hamutuk empreza 538.
Jornalista : Abílio Elo Nini
Editór : Evaristo Soares Martins
