SAMES rejeita prosesu rekrutamentu ba funsionáriu 12 mosu irregularidade
DILI, 5 novembru 2021 (TATOLI)—Diretór Ezekutivu Servisu Autonómu Medikamentu no Ekipamentu Saúde (SAMES), Santana Martins, rejeita informasaun ne’ebé sirkula iha públiku dehan prosesu rekrutamentu ba funsionáriu na’in-12 ba kargu xefe depatamentu mosu irregularidade.
Tuir Santana, durante ne’e ekipa juri halo de’it prosedimentu ne’ebé Komisaun Funsaun Publika (KFP) estabelese ho baze ba méritu.
“Ha’u atu klarifika de’it katak KFP mak halo selesaun ba xefe depratamentu na’in 12. Komisaun Funsaun publika mak iha kompeténsia atu hatan prosesu sira ne’e loos ka la loos, tanba ami la halo intervensaun ne’ebe rekrutamentu ne’e pur meritu,’’ Diretór Ezekutivu SAMES ne’e, hateten ba Agencia TATOLI iha nia kna’ar fatin, Kampu Alor, sesta ne’e.
Ba kestaun ne’e, Diretór SAMES husu ba pesoál ne’ebé mak la satifas bele reklama ba Prezidente juri liuliu ba KFP no aprezenta an atubele buka solusaun.
Tanba, nia esplika iha faze dahuluk iha selesaun dokumentu laiha reklamasaun, hafoin kontinua ba teste eskrita mós laiha problema nafatin.
“Agora tama ba entervista mak komesa grupu la passa iha teste eskrita sira levanta, maibé teste ne’e la’ós teste grupu. Tanba teste individu kada kandidatu mak halo reklamasaun tuir prosedimentu,” nia sujere.
Nune’e, Diretór Santana ne’e hatutan rekrutamentu xefe departamentu ne’e ho baze ba nesesidade SAMES nian, maibé KFP mak hala’o teste tuir méritu.
Vaga hirak ne’e ba Xefe Departamentu iha SAMES na’in 12, kompostu rekursu umanu iha diresaun armazeneamentu distribuisaun rua, Gabinete Garantia Kontrolu Kualidade kada diresaun iha departamentu rua liuliu iha sentrál no ba armazein rejionál hanesan Baucau, Maliana no Ainaro.
Jornalista : Felicidade Ximenes
Editór : Florencio Miranda Ximenes
