Fatin atu instala ekipamentu matan iha HorEX la sufisiente

BAUCAU, 11 novembru 2021 (TATOLI) – Fatin atu halo instalsaun ba ekipametu nian iha Hospital Referál Eduardo Ximenes (HorEX) Baucau la sufisiente.

Xefe Departamentu Klínika Matan HoREX Baucau, Nuno da Costa de Jesus, hateten, sala klínika matan iha HoREX la sufisiente atu halo instalasaun ba ekipamentu konsulta matan ne’ebé mak apoia hosi doadór sira.

“To’o agora ekipamentu sira-ne’e sei rai hela iha klínika, tanba kondisaun fatin ladún favorese atu halo instalasaun no laiha espasu atu aguarda ekipamentu sira,” Xefe Klínika Matan, ko’alia iha Vila Nova, kinta ne’e.

Nuno esplika, ekípamentu iha HorEX kompletu atu atende pasiente bainhira halo konsulta ba moras matan, maibé fatin mak seidauk sufisiente, nune’e ekipamentu hirak ne’e seidauk instala hodi atende pasiente sira hosi munisípiu Lautém, Viqueque, Baucau inklui Manatuto.

Bainhira instala ona pasiente sira bele ona hala’o operasaun ba matan nian iha HoREX Baucau, nune’e dadaun ne’e sei atende de’it ba kazu emerjénsia sira-ne’ebé presija halo sirúrjia.

“Ekipamentu ne’ebé seidauk instala mak biométriku atu halo preparasaun ba pasiente, nomoos iha bioskop balun ne’ebé nesesita iha klinika atubele halo diagnóstiku di’ak liután,” nia fundamenta. 

HorEX Baucau hetan apoia ekipamentu hosi European Talent Exchange Programme (ETEP), Research in Adaptive and Convergent Systems (RACS), The Fred Hollows hosi Foundation New Zealand, Australian Aid inklui Sentru Matan Nasionál.

Entretantu, pesoál saúde ne’ebé mak atende ba pasiente moras matan nian iha HoREX hamutuk na’in-hitu (7) inklui lojístiku ida.

Jornalista         : Natalino Belo

Editór               : Evaristo Soares Martins