BAUCAU, 14 novembru 2021 (TATOLI)- Partidu Frente Revolusionária Timor-Leste Independente (FRETILIN), realiza konferensia nivél postu ba dala-V iha Postu Administrativu Baucau villa, munisípiu Baucau, ne’ebé partisipa hosi delegadu suku hamutuk 11.
Koordenadór Partidu FRETILIN, Baucau Villa, Hernani de Jesús Araújo Ribeiro, hateten, objetivu hosi konferensia refere atu konsolida baze inklui hili reprezentante meza iha konferensia Munisípiu nian.
“Atu haforsa politika iha baze, konsolida ita-nia militantes sira iha baze atu haforsa politika ne’ebé tuir orientasaun Komité Sentrál FRETILIN (CCF, sigla Portugés) haruka,” Koordenador FRTILIN ne’e, hateten ba Agência TATOLI, iha Sentru Konvensaun Baucau (CCB, sigla Portugés) villa antiga, domingu ne’e.
Konferensia ba-dala lima ne’e partisipa direta hodi delegadu sira hosi suku 11, atu hili reprezentante meza hodi prepara ba konferensia nível munisípiu nian ba mandatu tinan lima hosi 2021 to’o 2026.
Hernani akresenta, eventu ida ne’e meiu ida atubele hametin no konsolida militante no simpatizante iha baze hodi hasoru elisaun liuliu fó vitória ba FETILIN.
Iha biban hanesan, membru CCF nasionál destakadu iha munisípiu Baucau, Abrão Gabriel dos Santos Oliveira, esplika konferensia ne’e atubele prepara an hasoru eventu polítika tuir mai hanesan eleisaun prezidensiál iha 2022 no elisaun parlamentar 2023.
“Objetivu dahuluk mak atu re-organiza fali estrutura partidu tanba eventu polítika barak akontese iha tinan hirak liu ba laiha tempu atu re-estrutura sub nasionál inklui postu.
Agenda importante iha konferensia refere sei hili mos reprezentante postu atu tuir konferensia Munisípiu ne’ebé tuir planu sei realiza iha loron 4 dezembru tinan-ne’e.
Abrão hatutan, Partidu Fretilin iha palavra onrra ne’ebé hateten “A Prática como Critério de Verdade” ne’ebé hatudu ona iha eleisaun liuba, katak Partidu polítiku seluk halibur forsa hotu mós nunka manán iha Baucau.
“Ami fiar ba oin sei di’ak liután ho tempu, esperensia sei organiza di’ak liutan atu atinje vitória iha 2023,” Abrão argumenta.
Entertantu totál partisipante konferensia nível postu hamutuk delegadu hamutuk 351 hosi suku 11 kompostu Tirilolo, Bahu, Buibau, Seisal, Buruma, Samalari, Gariuai, Vailili, Triloka, Caibada no Bucoli.
Jornalista : Natalino Belo
Editór : Florencio Miranda Ximenes
