DILI, 15 novembru 2021 (TATOLI)—Adjuntu Sekretáriu Jerál Partidu Frente Revolsionáriu Indepedente (FRETILIN), Flávio Maria Guterres da Silva, hateten FRETILIN preparadu no sei iha kandidatu Prezidente Repúblika ne’ebé sei deside hosi órgaun kolejiál partidu nian, hodi kompete iha eleisaun prezidensiál 2022.
Notísia Relevante: CCF aprova ajenda haat inklui realizasaun kongresu nasionál
“Fretilin prepradu no sei iha kandidatura ba Prezidente Repúblika hodi kompete iha eleisaun prezidensiál 2022, ne’ebé sei deside hosi órgaun kolejiál partidu nian,” Flavio Maria Guterres da Silva hateten ba Agência Tatoli iha sede Fretilin, Comoro, Dili, segunda ne’e.
Atu deside kandidatura FRETILIN nian, tuir kompeténsia bele liuhosi konferénsia nasionál, kongresu nasionál no reuniaun orgaun komité sentrál nian.
“Alternativu sira-ne’e mak sei deside hosi orgaun kolejiál partidu nian iha tempu tuir mai bainhira Prezidente Repúblika dekreta ona kalendáriu eleisaun nian,” nia esplika.
Tanba ne’e, maske atuál Prezidente Repúblika, Francisco Guterres Lú-Olo, deklara ona ba públiku katak prontu atu re-kandidata an hodi kompete iha eleisaun prezidensiál 2022, ne’ebé antes ne’e hanesan Prezidente Partidu FRETILIN hafoin asume knaar nu’udar Prezidente Repúblika, maibé sei deside hosi orgaun kolejiál partidu nian.
Maske militante sira iha ona diskusaun kona-ba kandidatura PR hosi FRETILIN atu kompete iha eleisaun prezidensiál 2022, maibé internalmente desizaun partidu nian ne’e tenke liuhosi reuniaun órgaun kolejiál nian ne’e, seidauk diskute kona-ba FRETILIN nia kandidatura ba Prezidente Repúblika.
Atu halo preparasaun ba eleisaun prezidensiál 2022 ne’e, nia informa, atividade partidu nian desde iha fulan-outubru tinan-ne’e hala’o ona preparasaun konferénsia nivél postu administrativu no munisípiu ne’ebé daudaun ne’e la’o namanas hela.
Adjuntu Sekretáriu Jerál FRETILIN ne’e dehan, konferénsia iha postu ho sub-rejiaun iha territóriu inklui Rejiaun Espesiál Óe-Cusse Ambeno (Raeoa), daudaun ne’e la’o hela mak iha postu administrativu sira iha munisípiu Baucau, Óe-Cusse no seluk tán nivél postu nian besik ramata ona, nune’e sei tama ba iha konferénsia munisipál.
“Ho konferénsia ne’e, estrutura sira iha mudansa no balun mantein hodi re-eleitu nafatin no fatin balun muda tanba konfiansa, nune’e ho dalan ida atu fortifika FRETILIN ba oin,” nia dehan.
Preparasaun sira-ne’e, tuir kalendáriu, konferénsia nivél postu ba iha munisípiu sei termina iha fulan-dezenbru 2021 antes tama iha selebrasaun loron Natal, nune’e iha tinan 2022 hakat ba iha kongresu nasionál partidu Fretilin nian, maibé kona-ba loron no fulan atu realiza kongresu nasionál seidauk termina.
“FRETILIN nu’udar partidu boot no istóriku preparadu ona atu tuir eleisaun prezidensiál, ho apoiu hosi nia militante sira iha territóriu nasionál, sei fó vitória ba kandidatura PR hodi manan iha eleisaun prezidensiál 2022,” nia dehan.
Notísia Relevante: CCF seidauk iha desizaun halo Kongresu Nasionál
Jornalista : Nelson de Sousa
Editór : Cancio Ximenes
