DILI, 16 novembru 2021 (TATOLI)– Institutu Defeza Nasionál Timor-Leste (IDN-TL), halo kanalizasaun bee-moos ba uma-kain 150 ho totál populasaun 500 iha aldeia Daralau, suku Bekora, postu administrativu Kristu Rei, munisipiu Dili.
“Kanalizasaun ne’e ho objetivu atu halo kaman ba populasaun sira ne’ebé mukit ba bee-moos iha aldeia Darelau,” Diretór IDN, Comodoro Donaciano Costa Gomes “Pedro Klamar Fuik” hateten liuhosi nota ne’ebé Agência TATOLI asesu, tersa ohin.
Projetu sosiál hosi IDN nu’udar programa bee-moos ba liberdade ho orsamentu rihun $6-resin ne’ebé uza hodi kompra materiál konstrusaun no instalasaun bee-moos inklui halo manutansaun rasik.
Sistema instalasaun husi projetu utiliza mákina bomba bee unidade tolu hodi transfere bee hosi tanke konservasaun ba to’o tanke ho distansia kuaze metru 690 metru hodi oferese bee-moos ba komunidade Daralau.
Iha biban ne’e, Xefe Aldeia Darelau, Santiago Maria Lobato, lori komunidade Darelau nia naran agredese wain ba IDN-TL ne’ebe konstrui no kanaliza ona bee-moos ba komunidade.
“Ami sente kontente tebes tanba durante ne’e bee-moos ba ami atu konsumu tenke la’o ho distánsia do’ok, maibé foin asesu,” Xefe Aldeia Darlau ne’e kongratula.
Jornalista : Natalino Costa
Editór : Florencio Miranda Ximenes
