DILI, 16 novembru 2021 (TATOLI)—Institutu Nasionál Saúde Timor-Leste (INS-TL) organiza halo konferénsia sientifika kona-ba kombate moras infesaun epidemiku iha ámbitu pandemia COVID-19 iha Timor Leste.
Konferénsia ne’e ho tema “Tackling Endemic Infectious Diseases in the Era of a COVID-19 Pandemic Progress, hallenges, and The Way Forward” ho objetivu atu kombate moras tuberkuloze, diabetes, infesaun respiratoria (ISPA, sigla Indonézia), diarreia no isin-katar. Pneumonia, denque no seluk tan.
Ministra Saúde, Odete Maria Freitas Belo, hateten, importasia ba konferénsia atu diskute no haree liu ba jestaun kazu sira liuliu ba moras infesioza sira nomós aprezenta rezultadu estudu atu haforsa laboratóriu nasionál halo teste ba moras infesaun sira.
“Moras infesioza mak COVID-19, moras ISPA no kazu tuberkuloze mak sei aas. Timor-Leste okupa númeru dahuluk iha kazu tuberkuloze, nune’e ita kontinua fó formasaun ba médiku sira atu halo diagnostika hodi kombate,” Governante ne’e afirma.
Oitavu Governu Konstitusionál fó prioridade tuir mandatu INS ba funsionamentu liuhosi peskiza, atu komprende dezenvolvimentu ho asaun -sira atu kontribui ba estudu tékniku no métodu hodi bele rekomenda ba prestasaun serbisu saúde kombate moras infesaun epidémiku.
“Institutu Nasionál da Saúde (INS) haksolok tebes organiza konferénsia ne’e atu atu avalia ” progresu, dezafiu no planu ba oin atu kombate moras infesaun epidémiku sira iha Timor-Leste,’’ Diretora Ezekutiva Institutu Nasionál Saúde, Domingas da Costa Pereira, hateten hafoin konferénsia siéntifika ne’e iha salaun Mauhoka, Surikmas-Dili, tersa ohin.
INS mós iha kna’ar atu halo formasaun ba profesionál saúde atu kontrolu no prevene infesaun no jestaun ba moras infesiosa sira hanesan mós COVID-19.
“Ita haree iha períodu COVID-19 ne’ebé iha infesaun makas halo mundu no Timor-Leste preokupa, nune’e matenek na’in sira preokupa no foti medida ba intervensaun atu halakon peste ne’e,’’ nia akresenta.
Jornalista : Felicidade Ximenes
Editór : Florencio Miranda Ximenes
