BAUCAU, 18 novembru 2021 (TATOLI) – Ministériu Edukasaun, Juventude no Desportu (MEJD) liuhusi ekipa auditória sira hahú rekolla dadus profesór voluntária iha munisípiu Baucau.
Xefe Ekipa Auditoria no Investigadór MEJD Nasionál, Rodolfo Aparício, esplika, ministériu orienta rekolla dadus profesór reklamante iha munisípiu Baucau hodi submete ba nasionál nune’e atende kondisaun profesór sira iha baze.
“Normalmente foin mak rekolla dadus, kona-ba desizaun atu fó saláriu ka lae, ne’e nível altu nian, maibé hanesan profisionál edukasaun nian, ami tuir orientasaun ne’ebé mak iha,” Rodolfo ko’alia iha Ensinu Sekundária Públiku Filiál Dom Carlos Filipe Ximenes Belo, Afaça, kinta ne’e.
Profesór voluntáriu ka reklamante sira komposta hosi nível eskola pre-eskolár, terseiru-siklu nível sekundária no téknika vokasionál iha munisípiu Baucau.
Rekizitu ne’ebé presiza mak tenke intervista profesór sira, tenke iha billete indentidade, kualifikasaun profesór nian, abitasaun literária, oráriu profesór, planu lisaun, livru dezenvolvimentu inklui kartaun vasina COVID-19.
“Sei iha tempu halo komunikasaun ba parte auditór atubele prienxe formuláriu, tanba hotu-hotu asume kna’ar hanesan profesór,” Rodolfo akresenta.
Tenke kria kondisaun
Profesór reklamante hosi Ensinu Báziku Filiál Uatame, Plácido dos Reis, hateten, dadus ne’ebé mak rekolla tenke iha kontinuasaun nune’e kria netik kondisaun, tanba profesór hala’o kna’ar tuir oráriu ne’ebé mak diresaun edukasaun estabelese kada eskola.
“Ami mós halo serbisu, ami mós iha nesesidade ne’ebé mak presiza osan, ne’e duni lalika rekolla de’it dadus, maibé atende mós ami-nia problema,” Plácido hateten.
Ekipa verifikadór hosi MEJD sei rekolla dadus profesór voluntária durante loron 14 iha munisípiu Baucau.
Entertantu, tuir dadus hosi Edukasaun Munisípiu Baucau totál profesór reklamante ka voluntária hamutuk 623 hosi totál profesór 2.200-resin no totál eskola hamutuk 243.
Jornalista : Natalino Belo
Editór : Evaristo Soares Martins
