DILI, 19 novembru 2021 (TATOLI)–Ministériu Edukasaun Juventude no Desportu (MEJD) tuir planu iha loron 22 novembru sei realiza seremónia entrega podér hosi Diretór Servisu Edukasaun Munisípiu Dili, Duarte Braganza ba Diretór foun, Calisto Guterres.
Diretór Servisu Edukasaun munisípiu Dili, Duarte Braganza, hateten, knaar ne’ebé nia simu hahú loron 07 marsu 2016.
“Loloos tinan rua de’it, maibé extende to’o tinan lima fulan hitu mak transfere knaar ba Diretór foun. Ha’u kontente tanba bele hetan fiar hosi ministériu hodi lidera edukasaun munisípiu Dili durante períodu tolu, ha’u kontente ho serbisu ne’e, maibé ladi’ak mak kleur demais, loloos períodu ida iha de’it tinan rua atu lidera,” Diretór Servisu Edukasaun munisipál ne’e dehan ba Agência TATOLI, iha ninia knaar fatin, Comoro, sesta ne’e.
Durante asume knaar, Duarte Braganza konsege halo serbisu hanesan kria jestaun pesoál ba dosente atu halo identifikasaun ba profesór sira tuir nesesidade no matéria ne’ebé nesesáriu atu halo kolokasaun no transferénsia tuir oráriu, tau matan ba parte infraestrutura hodi halo identifikasaun hafoin aprezenta relatóriu ba Governu Sentrál hodi buka solusaun.
Aleinde ne’e, kria liña koordenasaun serbisu hamutuk ho parseiru edukativa sira atu alkansa planu no programa setór edukasaun iha Dili, kria mós relasaun di’ak ho komunidade edukativa sira, inklui halo esforsu atu halo mudansa ba regra sira, hanesan hamosu uniforme ba eskola sira.
“Asuntu ne’e to’o agora sai problema boot, tanba eskola balun halo maibé eskola barak mak seidauk, ne’ebé asuntu uniforme ne’e kontinua sai hanesan polémika boot. Tanba ne’e, husu ba Ministériu Edukasaun, Juventude no Deportu atu haree asuntu ne’e ho sériu,” nia akresenta.
Diretór Servisu munisipál ne’e konsidera, uniforme importante atu identifika estudante sira, maibé Governu nunka toma konsiderasaun.
“Parte eskola kria uniforme, ikus mai fó sala fali ba eskola sira. Asuntu ne’e Servisu Edukaaun munisipál fó atensaun boot, maibé to’o agora laiha resposta ida,” nia tenik.
Durante ne’e halo mós koordenasaun ho Polísia Nasionál Timor-Leste (PNTL) kona-ba jestaun konflitu atu fó apoiu andamentu eskola.
Tuir Diretór ne’e, esforsu lubuk ida ne’ebé halo tanba hakarak lori susesu ba setór edukasaun iha munisípiu Dili, maibé barak mak seidauk hetan resposta pozitivu tanba presiza desizaun polítika, maibé hanesan líder nia sempre hatudu lideransa di’ak ho ema hotu atubele alkansa susesu.
“Ha’u hanoin tempu ona atu entrega serbisu ba líder foun, husu ba Diretór foun tenke serbisu hamutuk ho parte hotu atu lori nafatin susesu ba edukasaun iha Dili no buka rona malu atubele atinje meta ne’ebé iha,” nia fó hanoin.
Enkuantu, atuál Diretór Eskola Ensinu Sekundáriu Jerál (ESJ) 10 Dezembru, Calisto Guterres, ne’ebé atu asume kargu foun nu’udar Diretór Servisu Edukasaun Munisípiu Dili seidauk promete buat ida, maibé nia sei halo uluk avaliasaun ba planu no programa no buat ne’ebé merese atu hatutan nia sei mantein.
Jornalista : Tome Amado
Editora : Julia Chatarina
