BAUCAU, 22 novembru 2021 (TATOLI) – Komandu Polísia Nasionál Timor-Leste (PNTL) Munisípiu Baucau promove ajente pólisia na’in-hitu ba postu ajente prinsipál.
“Tempu ona hetan rekoñesimentu no apresiasaun durante hala’o kna’ar liuhusi parada ida-ne’e husi postu ajente sa’e ba ajente prinsipál,” Komandante PNTL Munisípiu Baukau, Superintendente Xefe Armando Monteiro, ko’alia Vila Nova, segunda ne’e.
Membru na’in-hitu ne’ebé promovidu hosi eskuadra nain-tolu, na’in-ida hosi administrasaun no na’in-tolu seluk hosi seksaun forsa rejerva.
Membru na’in-hitu ne’e mak hanesan José Gusmão Correia, Asio Cardoso, Justinho da Costa, Aleixo Nicodemos, Juvinal de Sousa, Ines da Costa no Gastão da Silva.
Membru na’in-hitu promove ba ajente prinsipál, tanba bazea ba dedikasaun serbisu durante tinan-neen (6) nia laran hanesan livre hosi prosesu krime no mós ba disiplinár.
Maske nune’e, Armando husu membru na’in-hitu ne’e atu kontinua serbí no hala’o kna’ar ho responsável, liuliu atu atende ba povu no nasaun.
Tuir nia, promosaun diviza refere nu’udar rekoñesimentu prestasaun serbisu, prémiu ka prezente ne’ebé mak povu no nasaun liuhosi institusaun PNTL fó.
“Labele kontente no urgullu buat-ne’ebé mak imi simu, maibé esforsu-aan aprende nafatin no mantein disiplina, evita hahalok ne’ebé mak prezudika ita-nia kna’ar no karreira iha future,” Armando fó hanoin.
Prontu asegura loron proklamasaun independénsia
Komandu PNTL Baucau daudaun ne’e preparadu atu asegura komemorasaun 28 Novembru ne’ebé mak sei realiza iha aldeia Darsula, suku Gariuai, postu administrativu Baucau Vila.
Komandante PNTL Baucau, Superintendente Xefe, Armando Monteiro, hateten, PNTL Baucau kontinua asegura seguransa ba atividade sira komemorasaun 28 Novembru hanesan feira, jogu komunitária no hasa’e Bandeira nasionál.
“Inísiu kedas ita prontu, dezde loron 12 novembru liubá abertura jogu komunitária, seguransa assegura atividade hanesan desportu komunitária komposta hosi futeból, voleiból, basketeból no tenis meza no ita kontinua fó seguransa másimu iha atividade feira ne’e,” nia katak.
Komemorasaun 28 Novembru parte seguransa la’os de’it responsabilidade hosi PNTL Baucau maibé integra mós iha serbisu konjuntu komandu operasaun koordenada PNTL ho FALINTIL-FDTL ne’ebé apoia mos hosi Batallaun Orden Públiku (BOP) no Komponente terrestre.
Jornalista : Natalino Belo
Editór : Evaristo Soares Martins
