Governu lansa sistema administrasaun Tributária ‘SIGTAS Versaun 3’ iha Baucau
BAUCAU 27 novembru 2021 (TATOLI) – Governu liuhosi Ministériu Finansa (MF), halo lansamentu Sistema Administrasaun Tributária ‘SIGTAS versaun 3’ iha munisípiu Baucau.
Ministru Finansa, Rui Augusto Gomes, hateten, lansamentu sistema informátika versaun avansadu liu ne’e, importante tebes atu moderniza serbisu administrasaun tributária atubele fornese atendimentu ba públiku ho efisiente no efikáz liután iha era dijitalizasaun no jere koleksaun reseita impostu ho justu no transparente.
“Karik ita hotu sei rekorda, iha tinan 2015, Governu dalimak introdús ona polítika Reforma Fiskál no Jestaun Finansa Públika. Tanba ninia importansia mak iha programa VIII Governu Konstitusionál, Reforma Fiskál no Jestaun Finansa Públika kontinua sai nu’udar prioridade,” Ministru Rui, hateten iha ámbitu seremónia lansamentu sistema informátika ne’e iha edifísiu INFORDEPE Vila Nova, munisípiu Baucau, sábadu ne’e.
Iha área Reforma Fiskál, Oitavu Governu Konstitusionál kompromete atu halo medida tolu durante ninia mandatu mak hanesan, reforma administrativa hodi aloka rekursu umanu ne’ebé própriu iha fatin própriu.
Nune’e mós moderniza sistema administrasaun Autoridade Tributária liuhusi utilizasaun sistema informátika ne’ebé atualizada, ezemplu, atualiza sistema SIGTAS versaun 3 ka avansadu liu.
Nune’e mós fasilita kontribuinte sira atu aloka rekursu ho efisiente no efikáz nune’e bele enkoraja disiplina konformidade tuir lei, hodi ikus mai bele kontribui ba aumentu reseita ba Estadu, liuliu impostu la’ós minarai.
“Hanesan ita hotu hatene katak, Estadu Timor-Leste ninia fonte finansiamentu prinsipál ba despeza públiku mak osan sira iha fundu mina-rai. Fonte ida-ne’e ladún hetan ona reseita petrolífera tanba folin mina-rai tún maka’as iha merkadu internasionál no volume produsaun mina no gás mós hahú menus ba daudaun. Ida-ne’e hatudu katak Estadu Timor-Leste labele kontinua depende de’it ba osan sira husi fundu mina-rai, liuliu ba tempu naruk”, Governante ne’e afirma.
Tanba ne’e, Ministru Finansa ne’e dehan, tempu ona atu Ita hanoin ho seriedade polítika atu diversifika Ita-nia ekonomia atu nune’e bele sustentável no reziliente hodi bele hasoru xoke-sira tantu husi li’úr hanesan pandemia Covid-19 no husi laran ka kalamidade publiku, dezastre naturál no inundasaun.
Enkuantu, reforma fiskál buka atu kria kondisaun no fó biban ba Estadu, liuhusi Autoridade Tributária atu bele kolekta reseita doméstika ho maneira ida ne’ebé justu, transparente no efisiente. Reseita domestika ne’e rasik bele sai nu’udar fonte finansiamentu alternativa ba despeza Estadu iha tempu naruk.
“Ha’u orgullu tebes ohin bele lansa sistema informátika versaun avansadu ‘SIGTAS Versaun 3’, nu’udar mekanizmu di’ak ida atu fasilita kontribuinte sira atubele prenxe sira-nia obrigasaun fiskál liuhosi plataforma online,” nia espresa.
Iha ámbitu ne’e, lansa mós Sistema Janela Únika Nasionál ASYCUDA World, portál online ne’e sei liga Autoridade Aduaneira ho liña ministériu, ajénsia no institutu públiku ne’ebé mak trata movimentu ema no sásan-sira hanesan Diresaun Jerál Komérsiu, SAMES, E.P, APORTIL, I.P no Kuarantena.
“Sistema koneksaun ne’ebé mak aplika iha servisu administrasaun públiku hirak ne’e, sei redus atrazu, kustu tranzasaun, inklui tempu libertasaun sásan iha fronteira terrestre, portu no aeroportu. Koneksaun online ne’e sei fasilita liután empreza-sira hodi halo sira-nia atividade komérsiu no sei ajuda Ministériu Finansa atu koleta reseita ho maneira ida-ne’ebé justu no transparente,” nia akresenta.
Lansamentu sistema SIGTAS versaun 3 no janela únika ne’e hanesan pasu importante ida ba Autoridade Tributária no Autoridade Aduaneira, Ministériu Finansa iha ámbitu Reforma Fiskál no Jestaun Finansa Públiku.
“Ha’u bele dehan ida-ne’e konkista boot ida ba Timor-Leste liuhusi Autoridade Tributária no Autoridade Aduaneira, Ministériu Finansa marka istória importante ida iha tinan 19 hafoin restaura ninia independénsia,” Ministru Finansa ne’e subliña.
Hafoin lansamentu ne’e, Autoridade Aduaneira mós sei asina Protokolu Kooperasaun Tékniku ho Diresaun Jerál Komérsiu, SAMES, E.P., APORTIL, I.P., no Kuarantena. Objetivu hosi protokolu ne’e maka atu estabelese liña komunikasaun formál atubele fasilita serbisu administrasaun públiku ida-ne’ebé mak efisiente no efikáz liután.
Jornalista : Antónia Gusmão
Editór : Evaristo Soares Martins
