DILI, 03 dezembru 2021 (TATOLI)–Ministru Ensinu Superiór, Siénsia no Kultura (MESSK), Longuinhos dos Santos, kansela kontinuasaun apoiu fundu bolsa estudu ba funsionáriu na’in-30 ne’ebé hala’o estudu iha Brazíl no Mozambique tanba durasaun tempu estudu ultrapasa ona.
“Ha’u labele fó tan adisionál ba bolseiru sira ne’e tanba sira-nia durasaun tempu estudu liu ona, balun tinan neen no balun tinan hitu ona. Bainhira ha’u fó tan adisionál ba sira, ha’u kontra ona dekretu-lei númeru 13/2020,” Ministru Longuinhos informa iha Parlamentu Nasionál, sesta ne’e.
Notísia relevante: FDCH kansela bolsa estudu ba veteranu nia oan na’in-tolu
Ministru esplika, dekretu-lei ne’e ho durasaun tempu ba lisensiatura ne’e tinan haat, maibé iha adisionál tinan ida, ho totál tinan lima estudu.
“Agora tempu sira ne’e ultrapasa ona maibé sira nunka ramata de’it estudu, tanba ne’e Ministru halo kanselamentu bolsa estudu ba sira,” nia akresenta.
Estudante na’in-30, kompostu hosi na’in-25 iha Brazil no na’in-lima iha Mozambique.
Jornalista : Tomé Amado
Editora : Julia Chatarina
