BAUCAU, 09 dezembru 2021 ( TATOLI) – Autoridade lokál suku Afaça, postu administrativu Quelicai, munisípiu Baucau, agradese ba VIII Governu Konstitusionál liuhosi Ministériu Obra Públika (MOP) tanba sei reabilita Estrada Rurál ba Dezenvolvementu (ERD) diresaun Afaça to’o Uaitame.
Xefe suku Afaça, postu administrativu Quelicai, Joaquim Fernandes Ximenes, informa dezde 2015 fó-sai ona despaxu atu reabilita estrada hahú hosi Dailari liga ba suku Afaça to’o kapela Darnafa, Dom Carlos Ximenes Belo.
Estrada hirak-ne’e, tama ona iha lista projetu 2019 maibé la ezekuta, nune’e liuhosi responsável Obra Públika Baucau informa estrada sei hahú reabilita liuhosi apoiu tékniku hosi ILO no orsamentu hosi governu iha tinan ne’e.
“Kontente, ami sente katak ami iha área remota la asesu ba estrada nune’e difikulta atu transporta produtu lokál ba merkadu maibé iha tempu VIII Governu nian nian sei realiza, ami agradese tebes,” Xefe suku Afaça, ko’alia iha Vila Nova, kinta ne’e.
Nune’e projetu refere sei hala’o uluk pakote tolu hahú hosi diresaun semtériu Afaça ba Darinafa liga ba suku Guruça no remata iha Uaitame ho distánsia kilómetru 9.5.
Enkuantu, diresaun hosi Dailari to’o Afaça la konsege realiza tanba kompaña hirak-ne’ebé submete proposta la prenxe kritériu.
Iha loron 29 novembru liubá, Komisaun Nasionál Aprovizionamentu (CNA, sigla Portugés) fó sai kompaña neen (6) mak sei reabilita ERD pakote neen hanesan iha postu Quelicai, suku Afaça-Uaitame hamutuk kilómetru 9 no postu Venilale vila ba suku Uaioli hamutuk pakote tolu ho distánsia kilómetru 8.5 hosi totál kilómetru 20.5 ho totál orsamentu millaun $3.
Nune’e, kompañia manán-na’in iha Afaça-Uaitame komposta hosi Flores Unipessoa.Lda distánsia kilómetru 0 to’o kilómtetru 3, pakote dahuluk kilómetri 3 to’o kilómetru 6 hosi kompañia Helsia Unipesoal.Lda no pakote datoluk kilómteru 6 to’o kilómetru 9 hosi kompañia Dilidi Unipessoal.Lda.
Suku Afaça iha populasaun hamutuk 1.778 hosi uma-kain 490 hosi aldeia tolu, Boralai, Hecobuti no Uligata.
Notísia relevante: Kompañia neen sei reabilita estrada rúral iha Baucau
Jornalista : Natalino Belo
Editór : Evaristo Soares Martins
