BOBONARO 12 dezembru 2021 (TATOLI)— FALITNIL-Forsa Defeza Timor-Leste (F-FDTL) liuhosi kompaña Enjinária halo konstrusaun tanke bee-moos ida ba komunidade iha aldeia Harame, Suku Aidab-Lete, Postu Administrativu Atabae, Munisípiu Bobonaru.
“Iha ambitu ezersisíu Cobra 21-2 ekipa forsa enjinária hola parte mós iha ezersisíu liuliu iha operasaun moldazen desesivu no sustentasaun. Nune’e forsa enjinária halo konstrusaun tanke bee-moos atu nesesita komunidade sira iha aldeia ne’e,” Kapitaun Enjinária, Gregório Soares, hateten iha bairru Damlaran, aldeia Harame -Bobonaru, domingu ne’e.
Konstusaun tanke bee-moos ida-ne’e tama ho pakote kanalizasaun ninian tanba entes konstrusaun hahú uluk koordenasaun ho komunidade hodi rekolla dadus.
“Ita hare’e katak, komunidade iha tankie bee-moos, maibé kiik oan ne’ebé la sufisiente ba komunidade sira. Entaun iha faze konstrusaun tanke ne’e inklui mós pakote kanalizasaun. Tuir planu durasaun konstrusaun ba tanke bee-moos finaliza durante semana ida,” Kapitaun Enjinária ne’e afirma.
Iha ezersisíu Cobra 21-2 F-FDTL liuhosi unidade enjinéria nian mós envolve iha loron kombate nian maka halo progresaun hosi Maliana hodi hola mós marsa kontatu.
Forsa Einjinária nia tarefa maka halo sensibilizasaun no halo limpeza ba ekipametnu funu nian ne’ebé maka hosi inimigu sira.
“Marsa pra-kontatu halo iha área hosi Maliana nian mai Kurlele to’o iha pontu área operasaun Damlaran nian,” Kapitaun Gregório afirma.
Forsa Enjinária rasik nia totál efetivu hamutuk 25, kompostu hosi ofisiál ida sarjentu lima, kabu ualu soldadu 11.
Iha biban hanesan, Xefe Aldeia Harame, Lino Tavares, hato’o nia sentimentu kontente tanba F-FDTL ajuda hala’o konstrusaun ba tanke bee-moos atu fasilita komunidade sira.
“Konstrusaun ne’e halo iha ami-nia área ida-ne’e no sai dezenvolvimentu ami-nia aldeia Harame, Suku Aidab-Lete nia komunidade sira atu asesu bee moos,” nia salienta.
Notísia Relevante: Simulasaun Forsa Amiga F-FDTL hadau baze inimigu iha aldeia Damlaran
Jornalista : Francisco Sony
Editór : Florencio Miranda Ximenes
