BAUCAU, 13 dezembru 2021 (TATOLI) – Ministériu Administrasaun Estatal (MAE) fó formasaun ba funsionáriu tékniku no assistente admistrasaun munisípiu Baucau hamutuk na’in-75 hodi prepara-aan ba podér lokál no desentralizasaun administrativa.
Formadór hosi Diresaun Jerál Desentralizasaun Administrativa MAE, Daniel dos Santos, esplika, objetivu hosi formasaun ba funsionáriu administrasaun munisipál atu kapasita rekursu umanu ne’ebé iha munisípiu tanba haree ba kompromisu, hodi prepara rekursu sira implementa podér lokál iha futuru.
“Formasaun ne’e atu halo koordenasaun serbisu entre munisípiu no sentrál, liuliu kapasitasaun rekursu umanu sira,” Formadór MAE hateten iha Sentru Konvensaun Baucau (CCB, sigla Portugés), segunda ne’e.
Formasaun durante loron-lima ne’e hosi segunda to’o sesta foka liubá matéria sira hanesan governasaun lokál, jestaun arkivu, lojístika, patrimóniu no komunikasaun.
Partisipante iha formasaun ne’e mai hosi tékniku no asisténsia administrasaun munisipál ne’ebé tuir alvu ba tékniku no asisténsia administrasaun sira hamutuk na’in-75 ne’ebé mai hosi postu administrativu neen no serbisu administrasaun munisipál Baucau nian.
Prezidente Autoridade Munisípiu (PAM) Baucau, Olívio ‘Bou-Lesa’ Freitas, hateten, formasaun ne’e atu kapasita funsionáriu hanesan ajente no permanente nune’e bele hala’o kna’ar kada loron iha munisípiu refere.
“Prepara sira-nia atu sai funsionáriu hodi serbí di’ak povu no rai Baucau,” nia katak.
Nune’e PAM hakarak hafoin formasaun ne’e iha tinan 2022 iha kapasidade ona atu kontribui tuir área serbisu ne’ebé atribui ona iha kada diresaun, tantu administrasaun munisipál no postu administrativu sira.
Bou Lesa mós husu atu formandu sira partisipa másimu durante formasaun loron-lima ne’e nune’e bainhira remata iha ona bukae iha futuru.
Jornalista : Natalino Belo
Editór : Evaristo Soares Martins
