BAUCAU, 14 dezembru 2021 (TATOLI) – Komandu Pólisia Nasionál Timor-Leste (PNTL) Munisípiu Baucau bandu komunidade dansa iha prezépiu durante selebrasaun Natál no tinan foun.
Komandante PNTL Munisípiu Baucau, Superintendente Xefe Armando Monteiro, husu komunidade sira-ne’ebé mak hakarak atu halo prezépiu hodi selebra loron Natál no simu tinan foun tenke dook hosi dalan públiku mínimu metru 10-15 atu nune’e labele halo perturbasaun.
“Fatin prezépiu ita bandu labele konsumu alkól, labele utiliza prezépiu halo dahur ka dansa no toka múzika ne’ebé mak laiha relevante ho loron Natál ida-ne’e, maibé bele toka múzika ne’ebé mak relevante ho loron Natál nian,” Superintendente Xefe hateten iha ninia kna’ar-fatin, tersa ne’e.
Nune’e, PNTL rasik sei foti medida liuhosi servisu operasaun iha terrenu bainhira iha komunidade ne’ebé la obedese ba regra ne’ebé fó-sai, sei prosesu tuir lei ne’ebé mak vigora.
Iha loron 09 fulan-dezembru tinan-2021, PNTL Baucau hamutuk Autoridade Munisipál Baucau realiza enkontru deside fó orientasaun ba autoridade sira iha nivél postu atu divulga informasaun ba komunidade bele ulitiza fogete iha kalan Natál no simu tinan foun 2022.
“Só loron ida-ne’e de’it mak komunidade iha baukau festeza loron ne’e ho fogete,” Armando argumenta.
PNTL Munisípiu Baucau sei destaka membru sira iha Igreja ho objetivu atu fó seguransa ba sarani sira-ne’ebé mak partisipa misa selebrasaun loron Natál no tinan foun ho livre no seguru.
Jornalista : Natalino Belo
Editór : Evaristo Soares Martins
