DILI, 16 dezembru 2021 (TATOLI)– Treinadór DIT FC, Alex Sam, hateten, otimista manán Aitana FC atu haksoit sai hosi zona mean, tanba daudaun pontu zero iha tabela klasifikasaun provizóriu Liga Futeból Timor-Leste (LFTL) époka ne’e.
“Ema hotu hatene ami agora iha zona mean, maibé sei hela jogu rua ba ami atu sai hosi liña mean ne’e. Aban (17/12), lokraik, hasoru Aitana ami sei hakas an manán no hasoru Lalenok ami nafatin hakas an hodi manán tan atu ami bele ona sai hosi zona mean”, Treinadór ne’e, hateten ba jornalista-sira liuhosi konferensia imprensa iha edifísiu LFTL Dili, kinta ne’e.
Nia dehan, durante ne’e DIT lakon tanba falla iha liña klaran no oin, nune’e hadi’a ona fallansu hodi manán Aitana.
“Durante ne’e ami falla makas liña klaran, maibé aban ne’e sai hanesan jogu finál ba ami, ami sei hakas an makas atu manán,” nia dehan.
Entretantu, klube ne’eé lidera tabela klasifikasaun provizóriu mak dahuluk, Karketu ho pontu 11, daruak, SLB pontu hitu, datoluk Lalenok ho pontu hitu, da-haat Ponta Leste ho pontu hitu, da-lomak mak ASSALAM ho pontu haat, tuir fali Aitana ho pontu haat no ikus liu DIT ho pontu zero.
Enkuantu, Aitana FC la partisipa iha konferensia imprensa ne’ebé organiza hosi LFTL tanba hein partisipa iha de’it jogu aban.
Jornalista: Hortencio Sanchez
Editór : Florencio Miranda Ximenes
