BOBONARO, 20 dezembru 2021 (TATOLI) – Ministériu Administrasaun Estatal (MAE), segunda ne’e distribui karreta haat no motorizada 42 ba autoridade munisipál Bobonaro hodi fasilita serbisu iha nível munisípiu to’o baze.
Veíkulu hirak-ne’e komposta hosi karreta marka hilux rua, rush rua, motorizada 42 ho tipu verza 36 no supra X hamutuk neen. Enkuantu viatura hirak -ne’e sei distribui ba kargu xefia sira iha diresaun administrasaun munisípal no funsionáriu sira-ne’ebé iha nesesidade nomós ba postu administrativu neen nune’e kada postu sei hetan motorizada rua.
Veíkulu hirak-ne’e Governu sosa ho montante rihun $208-resin ($208,578).Hosi montante ne’e $128,278 gasta ba sosa karreta haat no $80,300 sa motorizada 42.
Vise-Ministru Administrasaun Estatal, Lino de Jesus Torrezão, husu ba funsionariu sira atu utiliza patrimoniu estadu hirak-ne’e ho kuidadu nune’ebé bele dura ba tempu naruk.
“Tuir loloos karreta ho motorizada hirak-ne’e ita simu tiha ona, maibé dekretu-lei atu fó transporte no subsídiu ai-han ba funsionáriu sira Prezidente Repúblika la promulga, ne’ebé agora diretór jerál sira sei uza nafatin karreta hodi ba uma, maibé to’o uma tenke para, la naran sa’e arbiru,” nia hateten iha salaun administrasaun.
Governante ne’e apela ba diresaun lojístika autoridade munisípiu Bobonaro, atu halo kontrolu no manutensaun rútina ba patrimóniu hirak-ne’e, nune’e bele ajuda funsionáriu sira garante funsionamentu serbisu bele la’o ho di’ak.
“Agora ita-nia estrada protokolu di’ak hela, ne’ebé motorizada sira atu halai ba postu ne’e mak ita-nia estrada mak la favorese, maibé bainhira ita uza didi’ak tinan lima mak foin halo manutensaun,” nia fó hanoin ba utilizadór viatura estadu sira.
Entretantu, Prezidente Autoridade Munisípiu Bobonaro, Ernesto de Oliveira Barreto, agradese governu tanba oferese ona patrimóniu estadu ba kargu xefia sira, hodi fasilita no apoia serbisu sira ligada ho administrasaun no serbisu seluk iha munisípiu ne’e.
“Motorizada ho karreta sira-ne’e tenke uza ba nesesidade serbisu, labele tula fali família tún sa’e, depois uza tenke kumpri nafatin regra tránzitu katak, karta kondisaun tenke iha no uza kapasete, atu nune’e ita labele fó despeza boot ba estadu,” nia husu.
Jornalista : Sérgio da Cruz
Editór : Evaristo Soares Martins
