BOBONARO, 20 dezembru 2021 (TATOLI) – Sekretaria Estadu Juventude no Desportu (SEJD) segunda ne’e halo abertura ba kompetisaun desportu eskolár iha postu administrativu Maliana, munisípiu Bobonaro.
Atividade ne’e realiza tanba Sekretaria Estadu Juventude no Desportu serbisu hamutuk ho Ministériu Edukasaun, Juventude no Desportu (MEJD) hatún orientasaun ba serbisu edukasaun munisípiu Bobonaro atu organiza eventu ne’e tuir matadalan ne’ebé iha.
Programa desportu eskolár ne’e komposta hosi modalidade tolu mak hanesan; futeból, voleiból no atlestizmu, ne’ebé estudante mane no feto hosi eskola sekundáriu jerál no téknika vokasionál hosi postu administrativu neen mak kompete iha jogu refere.
Entretantu totál orsamentu ne’ebé SEJD aloka ba serbisu edukasaun munisípiu Bobonaro hodi realiza eventu ne’e hamutuk $19,500.00. Hosi montante ne’e $3.400.00 gasta ba prémiu no restante sei utiliza ba operasionál.
Diretór Nasionál Desportu Eskolár no Komunitária hosi SEJD, João Rodrigues, hateten, governu implementa aktividade ne’e iha nÍvel munisípiu tanba haree ba desportu iha alta prestasaun ladún fó efeitu másimu.
“Durante ne’e eskola sira iha Timor laran tomak ezije estudante, ezije fasilidade lubuk ida maibé ita la aproveita ho didi’ak, tanba ne’e mak kompromisu no komitmentu SEJD nian, hakarak promove desportu ba eskola sira atu koko sira-nia aproveitamentu no hosi klubu sira-nia aproveitamentu mak ita lori ba alta prestasaun,” nia ko’alia iha kampu futeból Maliana.
Nune’e atividade desportu eskolár tinan ne’e fó oportunidade liu ba estudante sira iha nível sekundáriu, maibé ba tinan oin SEJD planeia implementa mós ba estudante sira nível ensinu báziku, atubele espresa sira-nia talentu iha área desportu.
“Ita iha orsamentu, fasilidade no kondisaun mós iha hela, maibé fila-fali ba alin sira, tanba ne’e mak husu atu prepara didi’ak imi-nia mentalidade no kuida nafatin isin-lolon, atubele ba kompete iha nível nasionál,” nia enkoraja.
Entretantu, Diretór Servisu Edukasaun Munisipál Bobonaro, Crispim Moniz, konsidera programa ne’e bele ona responde foinsa’e sira-nia mehi, tanba durante ne’e atividade desportu eskolár sai mós prioridade ba edukasaun munisípiu.
Estudante sira-ne’ebé partisipa iha eventu ne’e mai hosi Eskola Téknika Vokasionál Atabae, Ensinu Sekundáriu Jerál Númeru 1 Dom Martinho da Costa Lopes, Ensinu Téknika Vokasionál Malibaca Yamato Maliana, Eskola CAFE Maliana, Eskola Téknika Informatika (ETI) Maliana.
Nune’e mós ESG São Miguel Hauba, ESG Cristal, ETV Cailaco, ESG Númeru 3 Bobonaro no ETV Berbu Divinho Palaka.
Jornalista : Sérgio da Cruz
Editór : Evaristo Soares Martins
