DILI, 20 Dezembru 2021 (TATOLI)- Funsionáriu iha Diresaun Nasionál Seguransa no Protesaun Patrimóniu Públiku (DNSPP), nain-1.934 ezije ba Parlamentu Nasionál atu rezolve direitu suplementu remuneratóriu tanba hanesan pesoál liña frente, maibé ladauk simu.
“Ami mai iha Parlamentu Nasionál atu ezije direitu konaba liña frente nian ne’ebé to’o oras ne’e seidauk simu. Maski, durante Estadu Emerjénsia no Konfinamentu obrigatáriu, ami pesoál Seguransa Sivíl hala’o servisu hamutuk ho PNTL iha fatin sira hanesan, Palásiu Prezidente, Palásiu Governu, Parlamentu Nasionál no fatin sira importante hanesan izolamentu Vera-Cruz, Lahane no Tibar atu asegura seguransa hodi kombate surtu kovid-19,” Portavóz Segurana Sivíl, Mauricio Jacinto Simões, hateten, ba jornalista-sira iha Parlamentu Nasionál, segunda ne’e.
Notísia Relevante: MF halo pagamentu suplementu remuneratóriu ba membru PNTL 3.821
Pesoál Seguransa Sivíl hala’o serbisu turnu ho polísia sira, maibe PNTL sira hetan ona direitu sumplementu remuneratóriu liña frente, maibé seguransa sivíl seidauk.
Pesoál hirak ne’e koloka iha territóriu nasional hamutuk ho PNTL, ne’ebé seidauk hetan direitu hamutuk 1.934, númeru ne’e inklui mós pesoál ne’ebé destaka iha Palásiu Prezidente Repúblika no Palásiu Governu.
Iha biban hanesan, Prezidente Komisaun B ne’ebé trata asuntu Negósiu Estranjeiru Defeza no Seguransa, Deputadu José Agostinho Sequeira Somoxo, hateten, seguransa sivíl sira mai protesta tanba seidauk hetan direitu ba suplementu remuneratóriu liña frente nian.
“Ami rona sira nia protesta hodi ezije ba Ministériu sira atu rekoñese ita nia ema sira nia servisu tanba sira serbisu iha fatin perigu hanesan izolamentu Vera-Cruz, Lahane, Tibar no fatin Kuarantena sira no edefisiu públiku sira durante konfinamentu oberigatóriu no Estadu Emerjénsia iha ámbitu COVID-19,” nia rekomenda.
Atu hatan ba kestaun ne’e, Jornalista Agência TATOLI tenta konfirma asuntu ne’e ba Diretór Jerál Sekretária Estadu Protesaun Sivíl (SEPS), Ismael Babo via telefónika, maibé la fó resposta tanba okupadu ho serbisu.
Notísia Relevante: Pagamentu suplementu remuneratóriu ba liña frente hosi fevereiru to’o dezembru
Jornalista : Natalino Costa
Editór : Florencio Miranda Ximenes
