Ezekusaun OJE 2021 hosi Bobonaro atinje 86,42%
BOBONARO, 22 dezembru 2021 (TATOLI)– Ezekusaun Orsamentu Jerál Estadu (OJE) 2021 ho montante $5.002,255,00 hosi munisípiu Bobonaro atinje 86,42%.
Prezidente Autoridade Munisípiu Bobonaro, Ernesto de Oliveira Barreto, informa persentajen ezekusaun ne’e hahú hosi Janeiru to’o fulan-dezembru 2021.
“Ita-nia ezekusaun tinan 2021 ho nia komitmentu $55,556,00, obrigasaun $829,750,89, ninia gastu anuál totál $3,493.28, balansu $623,574.83 no persentajen atinje ona 86,42%,” nia informa ba Agência TATOLI, iha Maliana, kuarta ne’e.
Maske taxa ezekusaun OJE tinan 2021 ne’e atinje ona 86,42%, maibé loron ida ka rua sei bele iha mudansa tanba parte aprovizionamentu sei halo pagamentu ba programa no projetu balun.
Nia haktuir, ezekusaun ne’e kobre hotu programa no projetu sira maibé persentajen mak kategoria balun sei mínimu iha programa esensiál balun, liuliu iha orsamentu kapitál dezenvolvimentu, tanba kauza hosi pandemia Covid-19 nune’e implementasaun projetu konstrusaun edifísiu foun haat atraza.
Enkuantu projetu foun haat ne’e mak hanesan edifísiu administrasaun postu administrativu Maliana, postu administrativu Bobonaro, armazein STAE Bobonaro no salaun enkontru administrasaun munisipál Bobonaro.
“Pandemia Covid-19 halo ita hasoru difikuldade boot, tanba ita-nia enjeñeiru sira lori dezeñu no BOQ ba ADN (Ajénsia Dezenvolvimentu Nasionál) halo korresaun, ema labele tama serbisu, pasiénsia ita hein uitoan, entaun foin lalais ne’e mak hetan aprovasaun, agora daudaun projetu tolu la’o dadaun ona, maibé salaun enkontru munisípiu mak seidauk implementa tanba dezeñu BOQ seidauk aprova,” nia esplika.
Enkuantu munisípiu Bobonaro hetan alokasaun OJE 2021 hamutuk $5.002,551,00 koloka ba kategoria saláriu no vensimentu $1,425,504.00 (79,95%), bens (sasán) no serbisu $ 889,680.00 (86,02%), kapitál menór $538,390.00 (98,9%), kapitál dezenvolvimentu $ 219,450.00 (54,14%) no transferénsia públika $1.929,551.00 (91,81%).
Notísia relevante: OJE 2O22, Autoridade Bobonaro prioritiza programa haat inklui projetu reapropriasaun PDIM
Jornalista : Sérgio da Cruz
Editór : Evaristo Soares Martins
