BOBONAR0, 23 dezembru 2021 (TATOLI) – Polísia Nasionál Timor-Leste (PNTL) munisípiu Bobonaro autoriza de’it komunidade sira tiru fogete iha selebrasaun kalan Natál no Tinan foun maibé tenke konsentradu iha kampu futeból Maliana.
Komandante PNTL munisípiu Bobonaro, Superintendente Antoninho Mauluta, hateten, desizaun ne’e komandu foti bazea ba despaxu hosi komandu jerál.
“Hakarak informa ba ita-nia komunidade no sarani sira katak, fogete ne’e só bele tiru iha 24 dezembru kalan Natál no 31 dezembru kalan hodi simu tinan foun, maibé tenke konsentra hotu iha fatin hanesan kampu futeból no fatin livre balun, depois mak foin tiru, labele tiru iha fatin-fatin,” nia informa ba jornalista sira, iha Maliana, kinta ne’e.
Maske nune’e, komandu mós sei la autoriza negosiante sira fa’an fogete ilegál ba komunidade sira, sunu iha loron bainbain, nune’e labele kontra regra ne’ebé iha no perturba ema seluk nia deskansa iha tempu kalan.
Nia dehan, bainhira tempu limitasaun ne’ebé komandu hasai mak komunidade sira viola, polísia sei kaptura inklui negosiante ne’ebé fa’an.
“Ema sira-ne’e ita foti mai hotu, sé labarik kiik mak tiru ita sei foti ninia inan ho aman, tanba ita fiar katak labarik sira laiha osan, ne’e hatudu inan aman mak fó osan sira hola sasan sira-ne’e,” nia subliña.
Jornalista : Sérgio da Cruz
Editór : Evaristo Soares Martins
