2022, PR sujere ba Governu hamenus importasaun husi rai-liur
DILI, 31 dezembru 2021 (TATOLI)—Prezidente Repúblika, Francisco Guterres Lú Olo, husu ba Governu Konstitusionál da-ualu atu dezenvolve setór produtivu iha tinan 2022 hodi hamenus importasaun husi rai-liur.
Nia dehan, dezenvolvimentu iha área agrikola, liliu agrikultura familiár importante atu produs aihan lokál tanba durante ne’e, Timor-Leste importante aihan barak liu husi estranjeiru kompara ho rai-laran.
“Ita nia País la’ós soberanu bainhira ita laiha soberania alimentár,”Francisco Guterres Lú Olo, iha ámbitu komemorasaun loron Eroi Nasionál ba dala 43 iha Rotunda Prezidente Nicolau Lobato Dili, Sesta ohin.
Krize boot ne’ebé kauza husi pandemia COVID-19 afeta maka’as ba ekonomia liliu kestaun soberania aihan, tanba ne’e ba futuru, Governu tenke tau iha planu proridade.
“Ita seidauk hatene loloos bainhira mak pandemia husi COVID-19 ne’e ramata. Foin lalais ne’e mosu fali variante foun ida ne’ebé da’et lais tebes. Ita husu ba ita nia-an rasik. Sá lisaun mak ita hasai husi pandemia ne’e, ho esperiénsia moruk ne’e, ita tenke buka dalan foun ba hala’o dezenvolvimentu,” nia dehan.
Jornalista:Tomé Amado
Editór :Agapito dos Santos
