BAUCAU, 02 janeiru 2021 (TATOLI)—Diretór servisu Munisipál Protesaun Sivil no Dezastre Naturál Baucau, Nelson Nunes, informa komunidade nain-lima (5) hosi suku Guruca, postu Quelicai hakotu iis no na’in-ida (1) grave iha área tasi Binagua, postu admistrativu Laga, munisipiu Baucau.
Nelson Nunes hahtuir, kronolojia akontesimentu ne’e bainhira vitíma nain-neen hamutuk ho familia hala’o pikenike iha tasi área Binagua mak mout iha tasi laran.
“Ita-nia komunidade ba pikenike iha tasi área Binagua mout, agora daudaun na’in-neen (6) hetan ona, na’in-lima mak mate no na’in-ida mak grave no halo hela tratamentu saúde Hospital Rejionál Eduardo Ximenes (HorEX, sigla Portugés),” Diretór Protesaun Sivil no Dezastre Naturál informa ba Agénsia TATOLI liuhosi telefónika, domingu ne’e.
Parte Protesaun sivil no Dezastre Naturál hamutuk ho Dirasaun Solidaridade Sosial Baucau inklui família prepara ona kaixaun no deretamente transporta ona ba rezidénsia vitíma sira-nian iha suku Guruca, postu administrativu Quelicai.
Vitíma na’in-lima (5) ne’ebé mate mesak família uma-laran de’it kompostu hodi feto na’in-tolu ho inisiál SG, BG no LG enkuantu mane na’in-rua inisiál AG no QG ne’ebé hotu-hotu mesak idade joven.
“Agora daudaun ita koordena ho autoridade Suku Guruca liu-liu identidade loloos vitima nian, nune’e prepara kaixaun tuir medida,” Nelson hateten.
Vitíma na’in-neen refere hetan salvasaun hosi komunidade bainhira hetan akontesimentu mout iha tasi laran, maibe na’in-ida mak hetan salva mezmu grave, enkuantu na’in-lima seluk hakotu iis antes evakua sai hosi tasi laran ka fatin akontesimentu.
Xefe Sentru Saude Laga, Jeronimo da Costa Ximenes, hateten vitima sira refere mout iha tasi-laran área Binagua tanba korente tasi mak dulas makaas.
“Sira ba haris iha tasi Binagua mak mate, tanba korente tasi mak dulas, lori tama sira na’in-neen ba tasi laran, na’in-lima mate kedas iha tasi laran, na’in-ida mak konsege salva no evakua kedas mai sentru saude. Ami halo tiha ona atendimentu no lori liu ba HoREX. Na’in-lima ne’ebé mate, sira-nia mate-isin família lori ona ba suku Guruca,” Xefe sentru saúde Laga hateten.
Vitíma na’in-neen iha mane na’in-rua, feto na’in-haat ho idade entre 16 to’o 28 ne’e, konsege evakua ba iha sentru saúde Laga maibé na’in-lima labele salva tanba mate kedas iha tasi laran no feto ida halo tratamentu kontinua ba HoREX Baucau.
Entretantu, Komandante Polísia Nasionál Timor-Leste Baucau, Superintedente Xefe Abtónio de Sá, hateten ema na’in-lima mate iha tasi Binagua bainhira festeza tinan foun (2022) hodi hala’o hela pikenike ho família.
“Sira na’in-lima, ohin, maizumenus tuku 14h00 lorokraik ne’e tun ba tasi ibun àrea Laga Binagua nian haris tasi mak mout. Sira na’in-lima ne’e mout hotu. Sira na’in-lima nia vida la salva hotu,” Komandante Munisipiu Baucau, António de Sà, hateten ba Agência Tatoli, via telefónika, domingu ne’e.
Tuir dadus ne’ebé nia parte konfima iha terenu katak ema na’in-lima nia mate-isin hetan ona no mane ida nia mate-isin mak hetan ikus hafoin lia-na’in sira hamulak tuir lisan rai ne’ebá nian,
Jornalista : Natalino Belo/Natalino Costa
Editór : Cancio Ximenes
