DILI, 04 janeiru 2022 (TATOLI)– Adjuntu Sekretáriu Jerál Federasaun Futeból Timor-Leste (FFTL), Frederico Martins, hateten, jogadór ekipa U23 hahú hala’o treinamentu atu prepara-an iha fizíku no tékniku hodi partisipa jogu Asian Football Federation (AFF) U23 2022.
“Treinamentu ba jogadór sira hahú ona horiseik no sei kontinua mellora treinamentu bainhira treinadór prinsipál, Fabio Macel da Silva to’o iha Dili, loron 06 janeiru ne’e,” Adjuntu Sekretáriu Jerál ne’e, hateten ba Agência TATOLI iha edifisiu FFTL-Dili, tersa ne’e.
Notísia relevante: Timor-Leste tama grupu A iha AFF CUP 2022
Treinamentu ba jogadór sira hala’o iha kampu FFTL Dili hahú segunda to’o sesta, hosi dader, tuku 07:00 to’o remata no lokraik, tuku 16:00 to’o remata.
“Hala’o treinamentu atu treinadór Timor-Leste mak sei halo selesaun ba jogadór sira hafoin partisipa iha eventu rejionál ne’e,” nia akresenta.
Kompetisaun AFF U-23 ne’ebé sei halo iha Cambodia, hahú husi loron 14 to’o 26 fevereiru 2022, ne’ebé Timor-Leste hamutuk ho Cambodia, Filipina no Brunei Darusalam.
Jogu AFF U23 sei hala’o iha Cambodia no sei partisipa hosi nasaun hamutuk 11, hanesan Indonézia, Singapura, Laos, Brunei Darusalam, Myanmar, Filipina, Cambodia, Thailandia, Malázia, Vietname no Timor-Leste.
Grupu B kompostu hosi Indonézia, Malázia, Myanmar no Laos. Enkuantu grupu C kompostu hosi Thailandia, Vietname no Singapura.
Notísia relevante: Ekipa Timor-Leste la konsege konkista vitória iha Suzuki Cup 2021
Jornalista : Hortencio Sanchez
Editór : Florencio Miranda Ximenes
