LIQUIÇÁ, 12 janeiru 2022 (TATOLI)–Ministru Obra Públika (MOP), Salvador Eugênio Soares dos Reis Pires, hateten, razaun Institutu Jestaun Ekipamentu, Institutu Públiku (IGE, sigla portugés), la halo atendimentu sedu ba pedidu populasaun tanba menus fasilidade.
“Desde mandatu VIII Governu iha tinan 2018 to’o agora IGE, I.P simu proposta hamutuk 400-resin, ne’ebé sira halo meiu hotu ho ekipamentu tuan hamutuk 30 hodi atende proposta hosi komunidade hamutuk 118-resin,” Ministru Salvador informa, iha ámbitu diálogu komunitáriu iha Liquiçá, kuarta ne’e.
Maski nune’e, institutu loke ona estrada foun kilómetru 78 iha territóriu tomak, normaliza estrada kilómetru 250, no normaliza mota kuaze kilómetru 35.
“Ho ida-ne’e IGE, I.P halo poupansa Orsamentu Jerál Estadu kuaze millaun $20-resin,” nia akresenta.
Notísia relevante: IGE, I.P konsege poupa osan Estadu millaun $7 iha tinan 2021
Biban ne’e, governante ne’e rejeita deklarasaun hosi abitante balun iha Liquiçá ne’ebé dehan ekipamentu IGE, I.P toba de’it iha edifísiu.
Liga ho proposta hosi komunidade atu normaliza sedimentasaun iha mota no morru protesaun sira, institutu la konsege normaliza ekipamentu to’o terrenu tanba presiza atende fatin barak.
“Bainhira proposta ne’e to’o, sira tenta atu halo mobilizasaun maibé hafoin esforsu sira halo, ami rona novidade katak administradór mobiliza ona empreza hodi fó atendimentu. Ida-ne’e maka dever Governu lokál, kuandu laiha kalamidade no bainhira ajuda hosi Governu sentrál seidauk to’o, tenki husu ajuda ba administradór,” Ministru dehan.
Iha biban hanesan, Prezidente Konsellu Juventude munisípiu Liquiçá, Laurindo de Jesus dos Santos, preokupa tanba durante ne’e pedidu hosi komunidade ba IGE, I.P la responde.
“Liquiçá nu’udar sidade besik kapitál nasaun, maibé tinan ba tinan mota hahú sobu daudaun, kuandu ami preokupa, administradór munisípiu husu tun husu sa’e mós rezultadu laiha, tanba ne’e husu ba IGE, I.P atu tau-matan tanba foin lalais akontese inundasaun no mosu dezastre boot tanba mota estraga óleu pesado iha Liquiçá no Jardín Eroi, situasaun ida-ne’e halo ema hotu tauk,” nia preokupa.
Ho ida-ne’e, Prezidente Konsellu Juventude rekomenda ba Governu atu koloka ekipamentu pezadu ida iha Liquiçá, nune’e bele fó atendimentu ba komunidade bainhira presiza atendimentu emerjénsia.
Jornalista : Antónia Gusmão
Editora : Julia Chatarina
