BOBONARO, 13 janeiru 2022 (TATOLI) – Ministériu Agrikultura no Peska (MAP) Munisípiu Bobonaro, kinta ne’e halo lansamentu kuda viveiru ai-kameli 600 iha postu administrativu Maliana Vila iha ámbitu selebrasaun loron nasionál ai-kameli no florestál.
Ministériu Agrikultura no Peska Munisípiu Bobonaro liuhosi departamentu reprezentasaun territoriál florestál, planta no industriál hamutuk ho komunidade sira kuda ai-kameli 600 iha Maliana Vila.
Xefe Departementu Reprezentasaun Territoriál Florestál, Plantasaun no Industriál, Martinho Bili-Mau, informa, viveiru ai-kameli hirak-ne’e kuda iha aréa Bulobu, aldeia Lahomea, suku Lahomea no tuir planu sesta ne’e sei kuda tán iha edifísiu públiku sira iha kapitál munisípiu Bobonaro.
“Ohin, ita komemora loron nasionál de Sândalo, ita kuda iha Lahomea hamutuk 200 pés inklui ita kahur uitoan ai-mahoni 10 pés kuda iha rai meia ektare, no aban ita sei distribui ba funsionáriu hotu ho totál 400 pés atubele kuda iha idak-idak nia edifísiu oin,” nia informa ba jornalista sira, iha Lahomea, kinta ne’e.
Iha VI Governu Konstituisionál liuhosi reuniaun Konselu Ministru hili ona 13 janeiru nu’udar loron nasionál ai-kameli no florestál (Dia Nacional do Sândalo e das Florestas) nian ho objetivu atu fó atensaun liubá kna’ar sentrál florestál iha manutensaun ba ambiente ida-ne’ebé saudável, iha konsrvasaun diversidade balada no ai-horis sira.
Nune’e mós iha dezemvolvimentu ekonómiku, liuliu ba ai-kameli ne’ebé rekoñese ona nu’udar ai-horis emblemátiku ne’ebé ho valór nasionál nian.
Ho nune’e, Xefe Departamentu Reprezentasaun Territoriál Florestál, Plantasaun no Industriál ne’e husu ba autoridade lokál no komunidade sira iha área refere no área seluk ne’ebé iha poténsia ba ai-kameli atu hadomi no kuida viveiru hirak-ne’e ho di’ak tanba ai-kameli hanesan identidade Timor-Leste nian.
“Ai-kameli hirak-ne’ebé iha ona komunidade sira-nia to’os, ita sei kontrola hotu, ezemplu hanesan iha Saburai, Bobonaro no Lolotoe, ita iha limitasaun guarda floresta ema komesa hasai hotu lori ba Indonézia, entaun ita labele kontrola hotu, ne’ebé komunidade sira mós presiza ajuda tau matan beibeik,” nia katak.
Jornalista : Sérgio da cruz
Editór : Evaristo Soares Martins
