HNGV rekolla reseita rihun $238 iha tinan 2021
DILI, 14 janeiru 2022 (TATOLI)— Diretór Administrasaun, Finansa no Lojístika Hospitál Nasionál Guido Valadares (HNGV), Raul Humberto Gama, informa, iha fulan janeiru to’o dezembru tinan 2021, konsege rekolla reseita hamutuk $238,989.82, hosi pasiente estranjeiru ho timor-oan ne’ebé halo operasaun no check up.
Hosi montante $238.989,82, rekolla hosi Departamentu Atestadu Médiku $28.731,50, Vasina Amarela $845,00, aluga fatin sentru matan $3.712,50, Sentru Matan Nasionál $3.385,00, Pediátria $834, Konoloscopia $1.500, Bloku Operasaun $6.950, Radiografia $24.183,50, Servisu Ambulatóriu $3.010, Maternidade $3.803,50, Banku Urjénsia $5.063.60, VIP $106.971,25 Fisioterapia $500, Odentolojia $20,00, Medisina Interna $1.830,85, Unidade Medikál checkup $42.108,57, Nifas $406,50, Konsulta fuan $25, Unidade Sirurjia $589,00, Unidade Mortuáriu $3.600,00, Beda $430,05, Hemodealisa $450, Acute care $40.
“Ema estranjeiru ne’ebé mai halo tratamentu iha HNGV hahú hosi fulan janeiru to’o dezembru tinan 2021 ne’e hamutuk 1.447 ho osan montante ne’ebé sira selu mai iha ospitál hamutuk $63,703.52 no Timoroan ne’ebé mai mak uza sala VIP no hala’o Check up hamutuk 3.696, ho osan $175,286.30. Nune’e iha tinan 2021, ita rekolla $238.989,82,” Diretór ne’e hateten ba Jornalista sira iha knar fatin-Bidau, sesta ne’e.
Diretór ne’e akresenta, tratamentu ba sidadaun estranjeiru nia presu rejista mak $5 no hala’o operasaun ho mak $500, alende ne’e pagamentu mós ba sala VIP, ne’ebé diferente ho pasiente timór-oan.
Daudaun, HNGV liuhosi asesór jurídiku prepara ona ezbosu hodi submeter ba Ministériu Saúde atu halo aprovasaun hodi redús kustu balun ne’ebé boot liuliu ba pasiente timór-oan.
Notísia relevante: HNGV rekolla reseita $214808.33 iha janeiru to’o novembru
Jornalista : Felicidade Ximenes
Editór : Florencio Miranda Ximenes
