DILI, 14 janeiru 2021 (TATOLI)– Treinadór Prinsipál Selesaun Nasionál Timor-Leste U-23, Fabio Joaquim Maciel da Silva, hateten, nia parte garante ekipa Timor-Leste sei hatudu jogu di’ak iha Asian Football Federation (AFF) CUP U-23, ne’ebé realiza iha fevereiru, iha Cambodia.
“Ita haree jogadór sira iha U-23 maiória jogu di’ak hotu tanba prova hatudu iha jogu Asian Football Confederation (AFC) U-23 ho jogu ne’ebé di’ak. Nune’e iha jogu ida agora ne’e ha’u fiar ita sei halo buat ruma iha ne’ebá,” Treinadór Fabio, hateten ba Agência TATOLI iha edifísiu FFTL, sesta ne’e.
Notísia relevante: Timor-Leste tama grupu A iha AFF CUP 2022
Daudaun ne’e, Treinadór hahú fó treinamentu ba jogadór sira iha área tékniku no fizíku hodi partisipa eventu internasionál ne’e.
Treinadór Prisinpá ne’e ko’alia ona ho Federasaun Futeból Timor-Leste (FFTL) atu buka nasaun sira iha Azia atu bele halo jogu amigavel, iha tempu besik, molok jogu hala’o iha loron 14 to’o 26 fevereiru.
“Iha jogu sira ba kotuk, ita ladun iha jogu amigavél bainhira hasoru ekipa forte sira hosi nasaun sira iha Azia ne’e, maibé agora ita tenke buka meiu oinsá atubele kontra nasaun forte balun nia ekipa halo jogu, nune’e ita bele hatene ita nia forsa tanba ita nia ekipa mesak joven de’it,” nia dehan.
Iha jogu AFF Suzuki Cup, nia dehan ekipa Timor-Leste la falla no la aat liu, maski lakon, maibé ho golu ne’ebé mihis la hanesan ho jogu sira iha tinan hira ba kotuk.
“Iha Suzuki Cup, ita falla duni, maibé ida ne’e la boot, nasaun barak mak orgullu ho ita tanba ita nia jogu iha diferente boot. iha 2019 ba kraik ita sempre lakon ho eskore ne’ebé mak boot hanesan lakon 7-0 to’o lakon 10-0, maibé agora laiha ona no ita bele lakon, maibé ho de’it 4-0 mai kraik, ida ne’e diferente ne’ebé hanoin ba oin ita sei bele,” nia relata.
Entretantu, FFTL deside hanaruk tan kontratu treinadór Fabio nian ba tinan ida tan hahú 01 janeiru to’o 31 dezembru 2022 fó treinamentu ba ekipa lafaek.
“Ha’u promote sei esforsu hodi lori Timor-Leste tama to’o semi finál jogu AFF CUP 2022,” nia promote.
Daudaun ne’e, jogadór hamutuk 27 mak hala’o hela treinamentu iha kampu FFTL segunda to’o sesta iha dader hahú tuku 07:00 to’o remata no lokraik tuku17:00 to’o remata.
Notísia Relevante: FFTL estende kontratu treinadór selesaun nasionál Fabio Maciel
Jornalista : Hortencio Sanchez
Editór : Florencio Miranda Ximenes
