DILI, 19 janeiru 2022 (TATOLI) – Adjuntu Sekretáriu Jerál Federasaun Futeból Timor-Leste (FFTL), Frederico Martins, hateten hahú aban selesaun nasionál U-23, aranka ba Bali-Indonézia hodi hala’o jogu amigavél ho selesaun Indonézia hodi prepara-an ba kompete jogu Asian Football Federation (AFF), ne’ebé sei hala’o 14 to’o 26 fevereiru iha Cambodia.
“Aban, ita nia ekipa aranka ba Indonézia hodi halo preparasaun no joga amigavél hasoru ekipa selesaun Indonézia nian no klube balun iha ne’ebá atu koko ita nia forsa,” Sekretáriu Jerál FFTL ne’e hateten ba Agência TATOLI iha edifísiu FFTL-Dili, kuarta ne’e.
Notísia relevante: Fabio garante “ekipa lafaek” sei hatudu jogu di’ak iha AFF Cup 2022
Nune’e, aban, Jogadór na’in-27 mak sei arranka ho aviaun Airasia Indonézia no ekipa sai hosi Dili bá Bali-Iindonézia iha tuku 11:00.
Entretantu, jogadór hirak ne’e sei akompaña direita hosi treinadór prinsipál Fabio Joaquim Maciel da Silva no ofisiál balun hosi FFTL.
“Ita nia jogadór hotu preparadu no iha kondisaun ne’ebé mak di’ak, aban sira bá no sei halo preparasaun másimu iha ne’ebá atu kompete iha AFF CUP 2022,” nia dehan.
Notísia Relevante: Timor-Leste tama grupu A iha AFF CUP 2022
Jornalista: Hortencio Sanchez
Editór : Florencio Miranda Ximenes
