DILI, 24 janeiru 2022 (TATOLI)– Tuir oráriu ne’ebé iha ekipa selesaun nasionál U-23 sei hala’o jogu amigavél hasoru selesaun nasionál Indonezia, iha 24 janeiru ne’e, maibé la konsege tanba kestaun tékniku balun, nune’e adia ba loron 27 to’o 30 janeiru.
Jogu amigavél ba ekipa rua ne’e sei hala’o iha Estádiu I Wayan DiptaStadium, Gianyar Bali Indonézia.
Notísia relevante: FFTL kontaktu ona Indonézia halo jogu amigavél
Nune’e, Adjuntu Sekretáriu Jerál Federasaun Futeból Timor-Leste (FFTL), Frederico Martins, hateten jogu ba ekipa rua ne’e atu koko Timor-Leste nia forsa hodi hala’o jogu iha AFF CUP 2022 ne’ebé sei hala’o loron 14 to’o 26 fevereiru iha Cambodia.
“Jogu amigavél ne’e meiu ida ba ita nia preparasaun atu ba joga iha AFF U-23, jogu ne’e hanesan FIFA Match Day. Maibé jogu ne’e adia tanba iha kestaun balun,” Adjuntu ne’e hateten ba Agência TATOLI iha edifisiu FFTL-Dili, segunda ne’e.
Nia dehan bainhira termina jogu amigavél jogadór selesaun nasional U-23 sei kontinua hala’o training Camp iha Bali Indonézia, molok dezkola ba Cambodia iha loron 10 fevereiru.
Notísia relevante: Timor-Leste tama grupu A iha AFF CUP 2022
Jornalista: Hortencio Sanchez
Editór : Florencio Miranda Ximenes
