DILI, 01 fevereiru 2022 (TATOLI)–Relasiona ho konfrontu ne’ebé akontese iha Tasi-tolu, tersa ne’e, Komandu Polísia Nasionál Timor-Leste (PNTL) munisípiu Dili identifika ona suspeitu na’in-10 ne’ebé envolve iha konfrontasaun ne’e.
“Konfrontu ne’e entre grupu arte-marsiál Ikatan Kera Sakti (IKS) no arte-rituál 77, ne’ebé problema ne’e nia hun mai hosi kazu omesídiu ne’ebé akontese iha loron-rua ka tolu ba kotuk, deskonfia membru hosi grupu arte-rituál 77 sona membru IKS inisiál NP, iha área tasi-tolu, Maslidu, to’o hakotu iis, bainhira vítima asiste festa ida,” PNTL munisípiu Dili, Superintendente Xefe Polísia, Hendrique da Costa, relata ba Agência TATOLI, via telefónika.
Nune’e, bainhira família sira lori vítima nia mate-isin sai hosi Hospital Nacional Guido Valadares (HNGV) atu ba haloot, derepente iha dalan mosu provokasaun tuda malu entre grupu rua to’o tama iha Tasi–tolu.
Komandante haktuir, hosi konfrontu ne’e, PNTL munisípiu Dili konsege halo identifikasaun no detein suspeitu na’in-lima.
“Maibé ohin bazeia ba ita-nia identifikasaun ba suspeitu kazu ne’e rasik, aumenta ba ema na’in-10. Ita mós rekolla evidénsia motorizada balun no daudaun iha Komandu munsípiu Dili. Ha’u hanoin identifikasaun ba suspeitu kazu konfrontu ne’e rasik ita sei kontinua nafatin,” nia akresenta.
Entratantu, suspeitu ho inisiál JB, ne’ebé maka oho vítima NP iha Tasi-tolu, daudaun ne’e detein ona iha sela Komandu PNTL munisípiu Dili hodi kumpre oras detensaun 72, molok submete ba Tribunál Distritál Dili (TDD) hodi tuir primeira interogatóriu.
Jornalista : Natalino Costa
Editora : Julia Chatarina
