Atividade aprendizajen iha ESJ Nicolau Lobato suspende to’o 04 fevereiru
DILI, 02 fevereiru 2022 (TATOLI)–Diresaun Servisu Edukasaun Dili simu rekomendasaun hosi Dirijente Eskola Ensinu Sekundáriu Jerál (ESJ) Nicolau Lobato, Comoro hodi hapara atividade ensinu aprendizajen ba estudante 1.110, hahú ohin to’o loron 04 fevereiru.
“Ita hapara lai atividade aprendizajen atu asegura estudante sira. Ita halo ona observasaun, maski situasaun ladún manas hanesan loron dahuluk, maibé ita aseita pedidu diretór eskola hodi hapara lai atividade estudante sira to’o loron 04 fevereiru,” Diretór Servisu Edukasaun Dili, Carlito de Araújo, hateten, iha ninia knaar fatin, Comoro, kuarta ne’e.
Notísia relevante: Konfrontu iha Tasi-Tolu, PNTL detein suspeitu 28 no apreensaun motór 10
Tuir Diretór, pedidu ne’e pertinente tebes, tanba di’ak liu prevene atu labele foti risku ba estudante sira.
“Keta halo labarik sira eskola hela maka grupu rua ne’e lansa filafali asaun ruma, difísil eskola atu kontrola estudante sira, tanba ne’e ami konsidera pedidu ne’e,” nia akresenta.
Nune’e mós, Diretór Eskola ESJ Nicolau Lobato, Marcos Soares Pacheco, hateten, maski akontesimentu ne’e horiseik no besik eskola, maibé buat hotu di’ak.
“Di’ak liu evita hodi asegura-an molok mosu buat seluk ne’ebé la espera. Ita-nia eskola la hetan buat ida maibé uma viziñu nian besik eskola ne’e maka hetan estragu. Tanba ne’e, ita deside di’ak liu hapara lai atividade aprendizajen to’o situasaun normál fali,” nia dehan.
Iha loron 01 fevereiru, mosu provokasaun to’o konfrontasaun entre joven sira, hahú iha área fatuhada, Comoro, to’o Tasi-tolu, ne’ebé momentu ne’ebá kedan membru Polísia Nasionál Timor-Leste (PNTL) ho FALINTIL-Forsa Defeza Timor-Leste (F-FDTL) konsege detein joven na’in-28.
Daudaun ne’e joven na’in-28 detein hela iha sela komandu PNTL munisípiu Dili hodi hein investigasaun molok submete ba prosesu interogatóriu dahuluk iha Tribunál.
Jornalista : Tomé Amado
Editora : Julia Chatarina
