Top

STAE verifika ona kandidatu PR na’in-ualu, na’in-haat sei iha prosesu verifikasaun

Diretór Jerál STAE, Acilino Manuel Branco. Imajen TATOLI/António ‘Dasiparu’ Gonçalves.

DILI, 05 fevereiru 2022 (TATOLI) – Sekretariadu Tékniku Administrasaun Eleitorál (STAE) verifika ona kandidatu Prezidente Repúblika na’in-ualu no haruka fila ona ba Tribunál Rekursu, maibé na’in-haat sei iha prosesu verifikasaun.

Notísia relevante: To’o ohin, Tribunál Rekursu rejista ona kandidatu PR na’in-11 

“Tuir lei STAE apoiu Tribunál atu verifika ba irregularidade ruma, liuliu proponente ba kandidatura sira. Tanba ne’e dezde semana kotuk to’o agora STAE simu ona lista proponente hosi kandidatura na’in-12.

Hosi ne’e iha ualu (8) mak STAE fó fila ona rezultadu verifikasaun ba Tribunál Rekursu no hela haat (4) mak kontinua halo hela verifikasaun, tarde liu semana oin konklui ona,” Diretór Jerál STAE, Acilino Branco, informa ba Agéncia Tatoli iha kna’ar-fatin, Caicoli, sábadu ne’e.

STAE hala’o kna’ar ida-ne’e bazea Lei númeru 15/2021, 14 jullu, sexta alterasaun hosi Lei Númeru 7/2006, 28 dezembru (Lei Eleitorál ba Prezidente Repúblika), artigu 19 númeru 2 (admisaun ba kandidatura sira), katak Prezidente Supremu Tribunál ba Justisa (STJ) apoiadu hosi STAE halo verifikasaun ba lista proponente hosi kandidatura sira.

Iha prosesu verifikasaun STAE verifika kona-ba irregularidade proponente sira, karik fó duplikasaun apoia ba kandidatura sira, proponente sei iha ka mate ona, eleitór ne’e rejista iha baze dadus ka lae.

Diretór Jerál STAE ne’e labele pronunsia naran entre kandidatura 12 ne’e tanba kompeténsia Supremu Tribunál ba Justisa nian ne’ebé prevista iha Lei númeru 15/2021, 14 jullu.

“STAE la rekomenda buat ruma maibé fó de’it rezultadu verifikasaun no Tribunál Rekursu mak sei haree no analiza ho ninia rekizitu sira seluk, karik iha buat balun seidauk kompletu sei informa fila-fali ba kandidatu idak-idak kompleta,” nia esplika.

Nune’e prosesu verifikasaun ne’ebé hala’o hosi STAE la’o di’ak tebes tanba lei fasilita alende kandidatura sira aprezenta lista ho mós formatu eletrónika.

Nia fundamenta, STAE nia kompeténsia mak halo verifikasaun depois transmite ba STJ/TR mak pronunsia kandidatu admite ka lae atu kompete iha eleisaun prezidensiál.

Bainhira STJ/TR pronunsia desizaun kona-ba lista admitida sira hafoin notifika STAE no CNE hodi promove divulgasaun iha Jornál Repúblika no fó-sai iha órgaun komunikasaun sosiál.

Hafoin públika lista kandidatura admitida sira sei hakat ba númeru sorteiu ne’ebé hatuur iha artigu 21 hosi Lei Eleitorál ba Prezidente Repúblika, nune’e tama ba iha prosesu administrativu sira seluk hanesan prepara imprime buletin votu no kampaña.

Notísia relevante: Tribunál Rekursu simu lista kandidatura PR to’o 04 fevereiru

Jornalista         : Nelson de Sousa

Editór               : Evaristo Soares Martins

Publisidade

Leave a Reply

Latest Post

error: Content is protected !!