SEA konsidera presiza regula importasaun roupa uzada hodi labele estraga ambiente
DILI, 07 fevereiru 2022 (TATOLI)—Sekretáriu Estadu Ambiente (SEA), Demétrio do Amaral de Carvalho, konsidera presiza iha regulamentu ba importasaun roupa uzada tanba bele fó risku ba ambiente.
“Timor-Leste atu tama dezastre lixu obralan (roupa uzada), tanba ropa sira barak mai hosi rai-li’ur ho presu baratu tebes no númeru boot. Tanba ne’e, atu evita ropa obralan sira aumenta ba beibeik, ita presiza ko’alia ho parte relevante sira hanesan Ministériu Turizmu Komérsiu no Indústria (MTKI) no Autoridade Aduaneira/Alfándega, ne’ebé tratata importasaun presiza haree, karik obralan ne’e labele hapara, maibé presiza hasa’e taxa, lae ba oin sei fó impaktu boot tebes ba ambiente tasi,” Sekretáriu Estadu hateten ba Agência TATOLI, iha ninia knaar fatin, Bebora, segunda ne’e.
Notísia relevante: PNTL bandu faan roupa obralan iha pontu entrada
Tuir governante ne’e, iha ona esperiénsia bainhira hamoos tasi-ibun deteta nakonu ho roupa uzada.
“Ami iha esperiénsia bainhira hamoos tasi-ibun nakonu ho roupa obralan de’it, ohin loron ita-nia inan-feton sira barak mak halo serbisu depende ba ropa obralan, tanba ema barak utiliza roupa ne’e sai modalidade ne’ebé fasil,” nia akresenta.
Iha fatin ketak, Negosiante roupa uzada iha área Praia dos Coqueiros, Rosita Gomes, hateten, roupa ne’ebé durante ne’e nia fa’an iha kualidade, enkuantu roupa balun ne’ebé laiha kualidade nia soe iha lixeiru.
“Roupa ne’ebé ami haree ba ladi’ak, hanesan kuak, ami soe iha lixeiru, roupa sira ne’ebé tempu udan mota lori ba para hotu iha tasi ne’e ha’u labele hatene, tanba dala-ruma maluk sira hela besik mota ninin mak soe roupa balun ne’ebé la uza ba mota kuak, entaun tempu udan mota lori ba para hotu iha tasi,” nia dehan.
Jornalista : Arminda Fonseca
Editora : Julia Chatarina
