DILI, 07 fevereiru 2022 (TATOLI)— Supremu Tribunál ba Justisa (STJ) liuhosi Tribunál Rekursu (TR) iha faze hala’o verifikasaun dokumentu ba kandidatu Prezidente Repúblika 2022-2027 na’in-17, molok halo validasaun atu kompete iha Eleisaun Prezidensiál ne’ebé realiza iha loron 19 marsu.
“Ami hahú halo verifikasaun dokumentu ba kandidatura Prezidente Repúblika nain-17, hahú iha loron sábadu to’o segunda ohin no sei remata iha loron 14 fevereiru,” Prezidente Tribunál Rekursu, (PTR), Deolindo dos Santos, hateten ba jornalista sira iha edifísiu TR-Caicoli, segunda ne’e.
Notísia relevante: STAE verifika ona kandidatu PR na’in-ualu, na’in-haat sei iha prosesu verifikasaun
Kandidatura Prezidente Repúblika ne’e kompostu hosi mane na’in-13 no feto na’in-haat, hanesan Kanidatura Independente Angela Freitas, Milena Pires ho kandidatura Independente, Felizberto Araújo Duarte (Independente), José Ramos Horta hosi partidu Congressu Nasionál Rekonstrusaun Timor-Leste (CNRT), Kandidatura Armanda Berta dos Santo (KHUNTO). Isabel da Costa Ferreira (Independente).
Kandidatu Virgílio da Silva Guterres (Independente), Kandidatu Francisco Guterres Lú-Olo (FRETILIN), Mariano “ASSANAMI’ Sabino (Partidu Demokrátiku), Kandidatu Tito da Costa Cristovão alias Lere Anan Timor (Independente), Rogero Tiago Lobato (Independente).
Nune’e mós kandidatu Hermens da Rosa Barros “Sekiliras Aihai” (Independente), kandidatu Luis Tilman (Independente), Kandidatu Martinho Gusmão (Independente), Anacleto Bento (PDRT), Antero Bendito (Independete) no Costáncio Pinto (Independente)
Prezidente TR informa seidauk bele fó sai kandidatu Prezidente Repúblika na’in-17 ne’ebé prense ona rekezitu, tanba sei iha faze verifikasaun dokumentu.
“Ha’u bele ko’alia kona-ba ida ne’e, maibé ha’u atu dehan de’it katak Tribunal Rekursu hahú halo ona verifikasaun ba ita nian kandidatura sira nian dokuementu, tuir prazu loron sanulu, sura hosi sábadu foin dadaun, termina loron 14 fevreiru, hotu maka ami foin fó sai rezultadu,” nia akresenta.
Molok ne’e, Diretór Jerál Sekretariadu Tékniku Administrasaun Eleitorál (STAE), Acilino Branco, informa STAE verifika ona kandidatu Prezidente Repúblika na’in-ualu no haruka fila ona ba Tribunál Rekursu, maibé na’in-haat sei iha prosesu verifikasaun.
Tuir lei STAE apoiu Tribunál atu verifika ba irregularidade ruma, liuliu proponente ba kandidatura sira. Tanba ne’e dezde semana kotuk to’o agora STAE simu ona lista proponente hosi kandidatura na’in-12.
Hosi ne’e iha ualu (8) mak STAE fó fila ona rezultadu verifikasaun ba Tribunál Rekursu no hela haat (4) mak kontinua halo hela verifikasaun, tarde liu semana oin konklui ona.
STAE hala’o kna’ar ida-ne’e bazea Lei númeru 15/2021, 14 jullu, sexta alterasaun hosi Lei Númeru 7/2006, 28 dezembru (Lei Eleitorál ba Prezidente Repúblika), artigu 19 númeru 2 (admisaun ba kandidatura sira), katak Prezidente Supremu Tribunál ba Justisa (STJ) apoiadu hosi STAE halo verifikasaun ba lista proponente hosi kandidatura sira.
Iha prosesu verifikasaun STAE verifika kona-ba irregularidade proponente sira, karik fó duplikasaun apoia ba kandidatura sira, proponente sei iha ka mate ona, eleitór ne’e rejista iha baze dadus ka lae.
Diretór Jerál STAE ne’e labele pronunsia naran entre kandidatura 12 ne’e tanba kompeténsia Supremu Tribunál ba Justisa nian ne’ebé prevista iha Lei númeru 15/2021, 14 jullu.
Nune’e, iha prosesu verifikasaun ne’ebé hala’o hosi STAE la’o di’ak tebes tanba lei fasilita alende kandidatura sira aprezenta lista ho mós formatu eletrónika.
Nia fundamenta, STAE nia kompeténsia mak halo verifikasaun depois transmite ba STJ/TR mak pronunsia kandidatu admite ka lae atu kompete iha eleisaun prezidensiál.
Bainhira STJ/TR pronunsia desizaun kona-ba lista admitida sira hafoin notifika STAE no CNE hodi promove divulgasaun iha Jornál Repúblika no fó-sai iha órgaun komunikasaun sosiál.
Hafoin públika lista kandidatura admitida sira sei hakat ba númeru sorteiu ne’ebé hatuur iha artigu 21 hosi Lei Eleitorál ba Prezidente Repúblika, nune’e tama ba iha prosesu administrativu sira seluk hanesan prepara imprime buletin votu no kampaña.
Notísia relevante: Tribunál Rekursu simu lista kandidatura PR to’o 04 fevereiru
Jornalista : Natalino Costa
Editór : Florencio Miranda Ximenes
