Top

TDD rona deklarasaun Joaquim no Barbara ba kazu publikasaun relatóriu KJP

TDD. Imajen Tatoli /Dok

DILI, 08 fevereiru 2022 (TATOLI)— Tribunál Distritál Dili (TDD), tersa ne’e (08/2), kontinua hala’o julgamentu ba Arguidu Padre HFG no rona mós deklarasaun hosi sasin, Joaguim António Maria Gomes da Fonseca no Barbara Nazare Andrade Oliveira ba prosesu kautela kona-ba públikasaun relatóriu investigasaun Komisaun Justisa no Pás (KJP) Dioseze Dili.

Arguidu HFG, antes ne’e nuudar Diretór ba Komisaun Justisa no Pás (KJP) Dioseze Dili ne’ebé hala’o iha fulan-agostu 2020, halo investigasaun ba kazu Topu-Honis, kona-ba kazu pedofilia ne’ebé envolve kondenadu eis Padre Richard Dasbach no visum ba orfaun sira.

Notísia relevante:  Jornalista sei la fó-sai ema-ne’ebé fornese dokumentu 

Nune’e, Tribunál Distritál Dili, notifika Eis Embaixadór Reinu-Unidu, Joaquim Fonseca ho nia feen Barbara Nazare nuudar sasin ba públikasaun relatóriu investigasaun KJP ne’ebé konsidera segredu justisa, maibé iha ona publikasaun ba públiku.

“Ha’u hetan duni relatóriu ne’e kazu Topo Honis,  la’ós hosi  Komisaun Justisa no  Pás,  maibé hosi Xanana Gusmão. Ha’u hasoru  Xanana Gusmão iha loron 10/9/2020, tanba hetan kontaktu hosi nia ema ida katak Xanana Gusmão hakarak hasoru ha’u iha nia uma Lecidere, ho nune’e ha’u hasoru nia  (Xanana Gusmão) iha nia uma. Hafoin hasoru tiha Xanana, no Xanana rasik entrega direitamente relatóriu ne’e.  Xanana husu atu fó relatóriu refere ba ha’u nia feen Barbara atu haree,”Sasin Joaquim Fonseca, deklara ba TDD, tersa  ne’e.

Hafoin entrega, Sasin ne’e dehan Eis Prezidente Repúblika Kay Rala Xanana Gusmão dehan relatóriu ne’e konfidensiál. Nune’e, iha loron 11 setembru 2020 entrega relatóriu KJP ne’e ba nia feen (Barbara) atu haree.

“Maibé ha’u nia feen (Barbara) baihira simu relatóriu ne’e atu lee no konsege haree no lee ho lalais. Tanba ne’e ami na’in-rua atu marka data hasoru fala Xanana Gusmão, atu hato’o saida mak  ha’u nia feen  haree ona hosi relatóriu ne’e, maibé la konsege tanba momentu ne’e susar kona ami rua, nune’e to’o ohin ami rua seidauk  hasoru fali Xanana,” nia afirma.

Tanba ne’e, Joaquim Fonseca haktuir nia parte sente hafodak hafoin relatóriu  rezultadu peskiza hosi KJP Dioseze Dili nian,  ne’ebé halo hosi Arguidu Padre HFG ba kazu Topo-Honis públika sai iha públiku.

“Ha’u hafodak bainhira relatóriu ne’e públika ka espalla ona iha públiku liuhosi média (Tempo Timor) ne’ebé ha’u konsege lee oituan iha lian tetun. Karik iha ne’e iha ema ruma mak dehan ha’u maka públika relatóriu ne’e, tanba momentu ha’u simu hosi Xanana katak relatóriu ne’e konfidensiál no momentu fó ba ha’u nia feen atu haree, depois de nia haree ha’u tau fali kedan iha gaveta kedan,” nia akresenta.

Sasin Joaguim afirma nia parte nunka lee no la deskute asuntu ne’e ho nia feen, tanba asuntu ne’e la importante no kosidera kestaun judisiáriu nian.

“Maibé, hafoin relatóriu ne’e espalla ka públika ha’u nia feen, mak hetan presaun no ameasa liu hosi telefónika, maibé ba ha’u laiha buat ida,” nia preokupa.

Iha biban hanesan, Sasin Barbara Nazare Andrade Oliveira, afirma nia parte rekoñese hetan duni relatóriu peskiza ba kazu Topo-Honis nian hosi nia la’en, iha loron 11 setembru 2020 hodi haree no halo rezumu.

“Ha’u nia laen fó hatene relatóriu ne’e hosi Xanana Gusmão fó ba nia atu haree, nune’e ha’u kosege haree no ha’u planu atu hasoru Xanana maibé la konsege to’o ohin loron tanba momentu ne’e ami hetan susar ida ha’u nia pai mate,’dehan Nia.

Sasin Barbara mós deklara ba Tribunál katak hafoin haree no lee hotu lalais, maibé la entrega relatóriu ne’e ba ema seluk.

“Relatóriu ne’e, ha’u simu hosi ha’u nia la’en duni, ha’u haree no tenta lee hodi halo rezumu, maibé ami la entrega ba fali ema ruma,”Barbara deklara.

Hafoin Tribunál  rona tiha depoimentu hosi sasin nain-rua no hanoin hosi Ministériu Públiku, deside hodi ajenda  fali julgamentu ba loron 19 fevereiru hodi rona sasin seluk relasiona ho kazu públikasaun relatóriu Topo Honis ne’e.

Audénsia Julamentu ne’e prezide hosi Juís Singular Evagelinho Belo, Ministériu Públiku reprezenta hosi Prokuradór Matias Soares, Arguidu sira hetan asisténsia legál hosi Advogadu Privadu Miguel Acacio Faria no Madre nain-rua.

Notísia relevante:  TDD rona deklarasaun Xanana ba publikasaun relatóriu KJP

Jornalista: Natalino Costa

Editór      : Florencio Miranda Ximenes

Publisidade

Leave a Reply

Latest Post

error: Content is protected !!