Dengue hamate labarik na’in-rua iha Bobonaro
BOBONARO, 08 fevereiru 2022 (TATOLI) – Diretór Hospital Referál Maliana (HRM), Bourdaloue Fernandes Moniz, fó-sai katak, hahú hosi fulan-janeiru to’o agora dengue hamate ona labarik na’in-rua iha munisípiu Bobonaro.
“Ita rejista kazu totál 26 agora na’in-tolu baixa hela, hosi númeru ne’e iha labarik na’in-rua mate ona, ida ita-nia kondisaun grave ami rekere ba Dili, liu loron rua mate iha-ne’ebá. Ida fali nia iha uma loron tolu ona, isin-manas maka’as familia lori mai foin atu tama ba iha ospitál laran ami seidauk halo tratamentu nia mate,” nia ko’alia iha Maliana, tersa ne’e.
Durante ne’e HRM rejista kazu hirak-ne’e maioria labarik kiik hosi tinan lima ba leten no ema-boot mai hosi postu administrativu Bobonaro, Balibo no Atabae, maibé barak liu mai hosi postu administrativu Maliana Vila.
Hahú hosi janeiru to’o agora Hospital Referál Maliana rejista kazu 26 no daudaun ne’e hela de’it labarik feto na’in-tolu mak sei baixa hela sala internamentu pediatria tanba kondisaun fraku uitoan.
“Pasiente balun baixa hela ne’e ita tau soru no halo sira toba de’it iha miskuteiru laran, atu kontrola ninia saúde,” nia esplika.
Diretór ne’e ne’e husu ba komunidade sira iha área risku atu nafatin halo limpeza iha uma ninin no oin, hamos vazu ai-funan no lata mamuk sira, labele tara ropa arbiru, hamoos tanki bee-moos semana ida dala-rua, atu nune’e labele fo oportunidade ba susuk Aides-Ageptis hosik nia tolun iha arredór uma.
Entretantu família pasiente Maria Madalaena hosi suku Odomau, hateten, durante akompaña nia oan baixa, médiku no enfermeiru sira halo atendimentu di’ak tebes tanba oras to’o sempre kontrola labarik sir- nia kondisaun no fó beibeik ai-moruk.
“Ha’u-nia oan ne’e moras iha kinta ne’e, ami lori mai sente fraku oituan depois hasai raan nia pozitivu, entaun doutór sira haruka baixa kedas, maibé agora ninia kondisaun di’ak oituan ona, isin-manas mós menus ona, komesa haan ona tanba doutór sira monta soru no fó ai-moruk beibeik,” nia katak.
Tuir observasaun Agência TATOLI iha Hospital Referál Maliana, nota katak pasiente sira-ne’ebé halo tratamentu iha sala internamentu pediatria, la’ós de’it afetadu moras dengue, maibé iha moos moras seluk, hanesan me’ar, isin-manas, iis-boot no seluk tan.
Jornalista : Sérgio da Cruz
Editór : Evaristo Soares Martins
