Deskonfia Levi Gomes “oho-an” iha fahi luhan

DILI, 09 fevereiru 2022 (TATOLI)— Polisia Nasionál Timor-Leste (PNTL) liuhosi Eskuadra Dom Aleixo, Munisípiu Dili deskonfia matebian Levi Gomes mak deside oho-an tanba observa iha fatin akontesimentu laiha indísiu ruma hatudu katak ema mak oho.
Komandante Eskuadra Dom Aleixo, Inspestór Asistente, Americo Fatíma, dehan kazu ne’e akontese iha loron tersa (08/2), maizumenus tuku 20:00,kalan, iha aldeia 20 setembru, suku Bebonuk, postu administrativu Dom Aleixo, munisípiu Dili.
“Ami nian observasaun temporáriu ba iha lokál akontesimentu laiha sasan ruma aat no laiha ema ruma halo ofensa ba nian (Levi Gomes). Tanba ai-horis hanesan ai-dila ne’ebé matebian nia monu fatin ba ne’e mos la hetan estragu. Nune’e situsaun ida ne’e hatudu mate ne’e katak kuaze 75% nia oho-an no 25% mak ami sei deskonfia hela,” Komandante Eskudra Dom Aleixo Américo, hateten ba ba jornalista sira iha Komandu Eskuadra Dom Aleixo-Comoro, kuarta ne’e.

PNTL observa iha lokál akontesimentu ne’e laiha forsa ruma hatudu katak ema mak oho nia to’o mate. Maibé deskonfia vítima mak uza tudik hodi kua rasik nia kakorok iha fahi-luan ida iha matebian nia uma sorin.
“Tudik ne’ebé deskonfia vítima uza hodi ko’a nia kakorok ne’e. Tuir informasaun ne’ebé mak PNTL Eskuadra Dom Aleixo rekolla iha lokál akontesimentu katak matebian rasik mak kadi iha loron ida antes molok nia mate,” Komandante Eskudra ne’e akresenta.
Daudaun ne’e, PNTL halo ona identifikasaun ba matebian nia ferik-oan no família sira seluk atu hatene motivu kazu ne’e.
“Informasaun ne’ebé nia feen fó mai ami ne’e antes ne’e nia moras. Nune’e ami nia ekipa foti hotu ona evidénsia balun liuhosi halo identifikasaun ba nia feen no familia sira seluk ne’ebé besik nia hodi kontinua investiga atu hatene motivu kazu ne’e,” nia akresenta.
Hafoin PNTL Eskuadra Dom Aleixo ba tiha lokál akontesimentu transporta kedan mate isin ba iha Hospitál Nasional Guido Valadares (HNGV) halo otopsia.
Matebian Levi Gomes nuudar funsionáriu média Timor Post iha área sirkulasaun jornál.
Jornalista: Natalino Costa
Editór : Florencio Miranda Ximenes

