DILI, 09 fevereiru 2022 (TATOLI)— Polísia Nasionál Timor-Leste (PNTL) liuhosi Komandante Jerál, Komisáriu Faustino da Costa, tersa ne’e, hala’o kolókiu ho parseiru internasionál sira hodi avalia progresu no dezafiu kooperasaun iha área kapasitasaun no dezenvolvimentu infraestrutura.
“Ita ko’alia kona-ba progresu no dezafiu kooperasaun ne’ebé iha ho ita nian parseiru sira. Nune’e ba oin ita atu haree hamutuk bele mellora no uniformiza liután liuhosi área kooperasaun ne’ebé mak ita hala’o. Tanba durante ne’e parseiru sira apoia ba PNTL barak liu mak kapasitasaun no dezenvolvimentu infraestrutura institusaun nian,” Komandante Jerál PNTL, Komisáriu Faustino da Costa, hateten ba jornalista sira hafoin partisipa atividade kolókiu ho parseiru Dezemvolvimentu iha City 8, Manleuana, kuarta ohin.
Iha kolókiu ne’e, Komandu PNTL mós agradese ba parseiru internasionál sira ne’ebé durante ne’e fó apoia tebes ba dezenvolvimentu institusaun PNTL.
Iha biban hanesan, Xefe Departementu Administrasaun, iha Komandu Jerál PNTL, Superintendente Polísia Calisto Gonzaga, hateten Komandu PNTL realiza reuniaun koordenasaun entre institusaun PNTL ho parseiru internasional sira.
“Ita aprezenta programa prioridade sira ba ita nian parseiru sira kona-ba saida mak instituisaun PNTL halo, hodi dezenvolve instituisaun no saida mak parte parseiru sira bele ajuda iha tinan ida ne’e, tanba ema sira la’ós foin mak atu ajuda, maibé ajuda kle’ur ona,” nia afirma.
Iha biban ne’e, Komandu PNTL mós aprezenta planu prioridade atu haree hamutuk hodi hamutuk dezenvolve instituisaun ho d’iak liután.
Parseiru dezenvolvimentu internasonal ne’ebé partisipa kolokiu ne’e hanesan NZ International Development Cooperation (NZ IDC), TLPDP-AFP, Japan International Cooperation Agency (JICA) no Fundasaun Asia (TAF), The United States Agency for International Development (USAID), United Nations Development Programme (UNDP) no The Korea International Cooperation Agency (KOICA).
Jornalista: Natalino Costa
Editór : Florencio Miranda Ximenes
