Tempu badak, MJ halo manutensaun ba mákina imprime BI iha munisípiu lima
DILI, 17 fevereiru 2022 (TATOLI)— Diretór Jerál Servisu Rejistu Notariadu, Crisogno da Costa Neto, hateten Ministériu Justisa hahú loke ona konkursu públiku, ne’ebé tempu badak empreza vensedór halo ona manutensaun ba mákina imprime Fargo, atu prodús Billete Indetidade (BI), hosi munisípiu Bobonaro, Baucau, Ermera, Manatuto no Liquiça.
“Mákina halo imprensaun BI iha munisipiu lima hanesan Baucau, Manatutu, Ermera, Liquiça ho Bobonaro kontinua avaria no seidauk funsiona, maibé daudaun ne’e aprovizionamentu Ministériu Justisa iha prosesu loke konkursu, nune’e tempu badak mákina imprime sira ne’e kompañia sei halo manutensaun,”Diretór Jerál ne’e hateten ba Agência TATOLI via telefónika, kinta ne’e.
Notísia relevante: Presiza halo manutensaun ba irrigasaun-sira iha Viqueque
Diretór Jerál ne’e rekoñese ho mákina Fargo ne’ebé avaria ne’e obriga sidadaun barak hosi munisípiu lima ne’e tenke mai halo tratamentu BI iha munisípiu Dili.
“Ita nia maluk sira barak maka tenke obriga-an mai halo tratamentu iha Dili, tanba mákina imprensaun iha munisípiu lima ne’e aat,” Diretór Jerál ne’e akresneta.
Tanba ne’e, Ministeriu Justisa sei fó solusaun iha tempu badak tanba asuntu ne’e importante ba atendimentu públiku.
Hataan ba tinta empresora laiha, Diretór Jerál, afirma tinta ba mákina fargo, ne’ebé prodús BI ne’e sei iha no sufisiente hela hodi fó atendimentu ba públiku.
“Daudaun ne’e tinta ba imprensaun BI iha hela, nune’e atendimetu servisu ba BI no pasaporte rasik la’o normál,” Nia afirma.
Crisogno da Costa esplika, prosesu atendimentu serbisu notariadu hosi munisípiu lima ba sidadaun-sira ne’ebé atu trata B I provizóriu, fó kartaun mutin no bele impime orijinál iha Dili ka munisípiu seluk.
Mákina fargo iha Bobonaro kondisaun tuan ona tanba halo akizasaun desde 2010 no munisípiu-sira seluk mak mákina foun ho ninia akizasaun balun iha 2018 no 2019.
Notísia relevante: DNJSRN submete ona pedidu manutensaun ba mákina fargo iha munisípiu haat
Jornalista : Natalino Costa
Editór : Florencio Miranda Ximenes
