Ministru Armindo entrega materiál emerjénsia ba EBC Atu-Aben
DILI, 20 fevereiru 2022 (TATOLI) – Ministru Edukasaun, Juventude no Desportu (MEJD) Armindo Maia, sesta ne’e entrega materiál emerjénsia ba eskola Ensinu Báziku Sentrál (EBC, sigla portugés) Atu-Aben, postu administrativu Bobonaru tanba eskola refere kondisaun la garante prosesu ensinu aprendizajen.
Diretór Nasionál Asaun Sosiál Eskolár (DNASE), Joaquim Martins, informa Agência Tatoli katak, materiál emerjénsia ne’ebé MEJD entrega ona ba eskola Atu-Aben ne’e tanba promesa ministru nian.
“Ministru rasik mak promete atu fó apoiu materiál emerjénsia ba eskola ne’e bainhira mai tau fatuk dahuluk ba konstrusaun eskola Edukasaun Pre Eskolár Atu-Aben iha loron 28 janeiru 2022,” dehan nia iha Vila Verde, Dili.
Tuir nia, EBC Atu-Aben konstroi iha 2005 agora halo tinan 17 ona maibé kondisaun la favorável ona atu realiza prosesu ensinu aprendizajen ba estudante sira. Tanba ne’e MEJD promete atu fó apoiu materiál emerjénsia ba eskola ne’e.
Ne’e duni iha sesta 18 fevereiru liubá, ministériu distribui ona materiál emerjénsia no diretamente entrega hosi Ministru Armindo ba eskola EBC, Atu-Aben hanesan ualen hamutuk unidade 130, kalen lizu 32 metru, Ai 6/12 hamutuk unidade 30.
Nune’e mós pregu xapeu kilograma 5, pregu 10 séntimu kilograma 5, pregu 12 séntimu kilograma 5 no pregu 15 séntimu kilograma 5.
Jornalista : Tomé Amado
Editór : Evaristo Soares Martins
