Top

SEPS prevee $80.000 sosa ró hodi fó apoia emerjénsia ba sidadaun

Sekertáriu Estadu Protesaun Sivíl, Joaquim José Gumão dos Reis Martins. Imajen Tatoli/Francisco Sony

DILI, 21 fevereiru 2022 (TATOLI)— Sekretáriu Estadu Protesaun Sívil (SEPS), Joaquim José Gusmão dos Reis Martins, hateten tempu besik, SEPS sosa ró ki’ik ida hodi halo movimentu iha tasi, nune’e bele ajuda ka fó asisténsia umanu ba sidadaun ruma ne’ebe mout iha tasi-laran bainhira hala’o atividade peska no seluk tan.

“Iha OJE 2022 ne’e, SEPS prevee $80.000, atu hola ró ki’ik ida hodi fó atendimentu ba ema sira ne’ebé mout iha tasi,” Sekretáriu Estadu Joaquim hateten ba jornalista sira iha edifísiu SEPS-Caicoli, segunda ne’e.

SEPS dehan foin daudaun maluk balun hosi Atauro mout iha tasi, maibé SEPS laiha ró, nune’e hetan asisténsia direta hosi Unidade Polísia Marítima rasik.

“Ró ne’ebé ita atu hola ne’e ró medida ki’ik ida, karik maluk balun hetan dezastre hanesan mout iha tasi laran, ró ne’e maka halo movimentu hodi halo evakuasaun ba sira,” tenik Sekretariu Estadu Protesaun Sivil Joaquim Gusmão.

Alende ne’e, Governante ne’e afirma SEPS mós iha planu atu sosa elikópteru ne’ebé daudaun iha prosesu diskusaun atu orsamenta iha Orsamentu Jerál Estadu 2023 nian.

“Ita planeia tinan oin tenke iha elikópteru ida, elikópturu ne’e pur volta millaun $1, agora daudaun halo ona diskusaun tanba ita presiza iha duni elikópter, tanba haree ba jeográfia ema ruma presiza ita bele halo intervensaun direta,” Governante ne’e akresenta.

Tanba iha akontesimentu dezastre natural iha loron 4 abríl tinan kotuk, governu husu elikópteru hosi Austrália hodi fó apoia emerjénsia ba komunidade afetadu sira.

“Ami hahú halo diskusaun atu oinsá ita bele haree tau iha orsamentu tinan oin nian. Nune’e bele atende lalais situasaun emerjénsia sira hanesan halo evakuasaun ita nian populasaun sira ne’ebé hetan dezastre, tantu sira ne’ebé moras hosi munisípiu evakua mai iha Dili ita bele halo, nune’e mós ba ita nian VIP sira ba iha munisipiu mak hetan buat ruma ita bele halo evakuasaun lalais” nia akresenta.

Nune’e, SEPS hahú halo diskusaun ho Polisia Nasionál Timor-Leste (PNTL), FALINTIL-Forsa Defeza Timor-Leste (F-FDTL), Timor GAP, empreza públika, atu prepera rekursu liuliu pilotu ba elikópteru.

OJE 2022 ba MI

Orsamentu Jerál Estadu (OJE) 2022 ba Ministériu Interiór (MI) ho montante $22,678,467

Hosi orsamentu ne’e alokadu fahe ba kategoria saláriu no vensimentu $10,362,308, bens no servisu $6,081,604, kapitál menór $3,965,000, kapitál dezenvolvimentu $1,653,690 no trasferénsia públika $615,865.

Alende ne’e, OJE 2022, Parlamentu Nasionál liuhosi komisaun B ne’ebé trata asuntu defeza no seguransa hatama proposta hodi aumenta orsamentu ba SEPS atu hala’o serbisu di’ak liután iha tinan 2022.

Tanba haree ba orsamentu hirak ne’e ladun sufisiente ba Ministériu Interiór no Sekretária Estadu Protesaun Sivil (SEPS), nune’e Deputadu sira iha komisaun B ne’ebé trata asuntu defeza no seguransa hatama proposta hodi husu orsamentu adisionál.

Proposta hirak ne’e mak hanesan, proposta númeru 83 ho titulu Ministeriu Interiór kategoria despeza, salariu no vensimentu iha programa ho kódigu 366 kona-ba seguransa nasionál, ho dotasaun inisiál $8,370,320 hetan alterasaun hodi aumenta $195.039, nune’e dotasaun finál sa’e ba $8.565.359.

Orsamentu adisionál ne’e submete ba Sekretária Estadu Protesaun Sivil (SEPS) hodi halo rekrutamentu koordenador dezastre hamutuk 67 ba postu administrativu-sira no apoiu finanseiru ba funsionáriu iha rejime turnu ne’ebé hala’o serbisu iha sede sentru operasaun dezastre.

Nune’e mós proposta 86 kona-ba kategoria bens no servisu  iha alterasaun aumenta $29.645 hodi aloka ba SEPS hala’o sensibilizasaun informasaun ba autór save implementasaun iha komunidade nivél nasionál no lokál kona-ba planu asaun nasionál (PAN 1325) rezolusaun konsellu seguransa Nasaun Unida no sensibilizasaun informasaun PAN ba diresaun iha Ministériu.

Proposta 87 ho kategoria despeza bens no servisu iha mós  alterasaun aumenta $3,538,076, ho orsamentu adisionál ne’e aloka ba SEPS hodi atende viajen lokál nesesáriu ba programa distribuisaun materiál konstrusaun ba vitíma dezastre iha munisipiu, liña komunikasaun internet iha sentru operasaun dezastre no halo akizasaun apoia vitima dezastre naturál.

Proposta 88 kategoria despeza transferensia públika ho alterasaun aumenta $2,384,135, adisionál ne’e kobre ba SEPS   atu apoia funsionáriu hodi hala’o serbisu no responde orsamentu mão de obra ho transporte ba família vitíma dezastre naturál.

Entretantu, proposta 89, kona-ba kategoria despeza kapitál menór ho alterasaun aumenta adisionál $1,373,500, hodi aloka ba SEPS atu sosa veíkulu espesializadu ho totál unidade tolu ba Munisipiu Manatutu, Liquiça no Ermera. Halo mós akizasaun sistema alerta iha Dili, ekipamentu espesifiku hanesan kontentór desmontave hodi distribui ba nivél nasionál 12, lokál 26 no seluk tan.

Jornalista  : Natalino Costa

Editór        : Florencio Miranda Ximenes

Publisidade

Leave a Reply

Latest Post

error: Content is protected !!