BAUCAU, 22 fevereiru 2022 (TATOLI) – Projeitu Konstrusaun no Reabilitasaun Infraestrutura Edukativa (PKRIE) iha Baucau dadaun ne’e hahú ona no tuir planu sei halo lansamentu fatuk dahuluk iha postu administrativu Baguia iha loron 28 fevereiru.
Diretór servisu munisipál edukasaun Baucau, Augusto Hornai Ximenes, hateten, grupu komunitária sira maioria foti ona orsamentu hamutuk pursentu 25 hosi totál projeitu hamutuk 29 no prosesu obra hahú ona.
“Eskola 26 mak daudaun ne’e hahú hada fondasaun, estaka no tuir planu loron 28 mak sei halo lansamentu nível munisipál iha Baguia,” Diretór edukasaun Baucau hateten iha ninia knar-fatin, Vila Nova, tersa ne’e.
Loloos ne’e PKRIE Baucau hamutuk projetu 30, maibé Ministériu Edukasaun, Juventude no Desportu (MEJD) deside kansela tiha Ensinu Báziku Filiál (EBF) Bucoli tanba razaun foin lalais mosu dezastre natural no kondisaun eskola presiza konstrusaun foun.
Nune’e hosi projetu 29 refere, kada eskola sei reabilita edifísiu ida to’o tolu ho sala aula la hanesan mínimu rua to’o neen.
Antes ne’e alokasaun orsamentu ba PKRIE iha Baucau totál orsamentu hamutuk $341.478.83 hosi projetu 30 maibe ho kanselamentu EBF Bucoli ho orsamentu $39.464.14 nune’e hela orsamentu hamutuk $302.014-resin.
Porjetu refere ho tipu komunitária liuhosi kategoria transferénsia públika no tuir kalendariu sei finaliza durante fulan tolu maibe tanba kondisaun klima sei finaliza iha fulan-juñu.
Augostu rekoñese durante implementasaun projetu refere sei fó impaktu tanba iha eskola balun presiza sobu no sei barullu durante prosesu aprendijazen.
“Espera katak bele finaliza lalais atu estudante sira utiliza ba prosesu aprendijazen,” Augostu akresenta.
Jornalista : Natalino Belo
Editór : Evaristo Soares Martins
