BAUCAU, 22 fevereiru 2022 (TATOLI) – Ministériu Edukasaun Juventude no Desportu (MEJD) liuhosi servisu munisipál edukasaun Baucau distribui ona diploma estudante finalista ensinu sekundária no bázika ba kada eskola iha Baucau.
Diretór servisu munisipál edukasaun Baucau, Augusto Hornai Ximenes, hateten, kada tinan distribuasaun diploma sempre tarde nune’e edukasaun antesipa ho buletin aprovasaun hodi asesu ka inkrisaun ba universitáriu sira.
“Ami fahe ona iha loron 11 ba kada eskola sira,” Diretór Edukasaun Baucau hateten iha ninia kna’ar-fatin Vila Nova, tersa ne’e.
Augusto esplika, bainhira esola sira prenxe hotu ona husu estudante sira atu akompaña informasaun nune’e sei asina inklui hanehan liman antes diretór edukasaun asina no ikus bele fahe ba estudante sira.
Prosesu hirak-ne’e hotu depende ba eskola sira atu aselera prenximentu valór no edukasaun Baucau orienta atu inísiu fulan-marsu bele lori hikas ba edukasaun atu diretór edukasaun asina no tau karimbu.
Totál diploma ne’ebé distribui iha Baucau hamutuk 5.703 ho kategoria ensinu sekundária, siénsia teknolojia hamutuk 1.138, siénsia sosiál 948, tékniku vokasionál 270 no ensinu báziku 3.328.
Jornalista : Natalino Belo
Editór : Evaristo Soares Martins
